சித்தர்கள் இராச்சியம்

நீடித்த இளமையோடும், நோயற்ற உடல் நலத்துடன் வாழ சித்தர்கள் பல கற்பவகைகளை அருளியிருக்கின்றனர். பொதுவில் இவை மருத்துவ காயகற்பம், யோக காயகற்பம் என இரு பிரிவாக வகைப் படுத்தப் பட்டிருக்கிறது. இது பற்றி ஏற்கனவே நாம் விரிவாக பார்த்திருக்கிறோம். புதியவர்கள் / தேவையுள்ளோர் அவற்றை இந்த இணைப்பில் சென்று வாசிக்கலாம்.

அந்த வரிசையின் இன்று கருவூரார் அருளிய வல்லாரைக் கற்பம் பற்றி பார்ப்போம். இந்த தகவல் "கருவூரார் வாதகாவியம்" என்ற நூலில் இருந்து சேகரிக்கப் பட்டது. அந்த பாடல்கள் பின்வருமாறு...

இருப்பான் வெகுநா ளியல்புடனே தானும் 

வருந்தும்வல் லாரச்ச மூலத்தைத் தான்கழுவி

விரித்து நிழலுலர்த்தி மேவிப்பின் சூரணஞ்செய்

கருத்தை யிருத்திநன்றாய்க் கற்பத்தைக் கொள்வாயே

வல்லாரைச் சமூலம் எடுத்து, அதனை நன்றாகக் கழுவி அதனை விரித்து நிழலில் காயவைத்துக் கொள்ள வேண்டுமாம். பின்னர் அதனை சூரணமாக செய்து சேமித்துக் கொள்ளவும். தினமும் இந்த சூரணத்தில் வெருகடி* அளவு எடுத்து உண்ண வேண்டுமாம். இவ்வாறு தொடர்ச்சியாக ஒரு வருடம் உண்ண வேண்டும் என்கிறார்.

இவ்வாறு ஒரு வருடம் தொடர்ந்து உண்டால் நரை திரை நீங்குவதுடன் சிறந்த உடல பலத்துடன் பதினாறு வயது குமரன் போல் நூறு வயது வரை வாழலாம் என்கிறார். இந்த காயகற்பம் உண்டவர்கள் சித்தர்களைப் போன்று தமிழில் நல்ல தேர்ச்சியும் பெறலாம் என்கிறார். இந்த கற்ப முறைக்கு பத்தியம் எதுவும் சொல்லப்பட வில்லை. 

குறிப்பு :  சமூலம் என்பது செடியின் வேர், தண்டு, இலை, பூ, காய், விதை என அனைத்தும் அடங்கியது.  

* வெருகடி = வெருகு என்பது காட்டுப் பூனையை குறிக்கும். வெருகடி என்பது பூனை தன் காலில் உள்ள பெருவிரல் உள்ளிட்ட மூன்று விரல்களினால் எடுக்கும் மண்ணின் அளவு. பழந்தமிழர் அளவை குறியீடுகளில் வெருகடியும் ஒன்று.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

சித்தர்கள் அருளிய காயத்ரி மந்திரங்கள் வரிசையில் "பிரம காயத்ரி” மந்திரத்தினையும் அவற்றினைப் பயன்படும் வழிமுறைகளையும் இன்றைய பதிவில் காண்போம். இந்த தகவல்கள் அகத்தியரின் “அகத்தியர் 12000” எனும் நூலில் இருந்து சேகரிக்கப் பட்டவை. 

அகத்தியர் அருளிய காயத்ரியை பார்ப்பதற்கு முன்னர் தற்போது புழக்கத்தில் இருக்கும் “பிரம காயத்ரி” மந்திரத்தை கீழே இணைக்கப் பட்டுள்ள காணொளியில் கேட்கலாம். இது சமஸ்க்ருத மொழியில் அமைந்தது.

இனி அகத்தியர் அருளிய “பிரம காயத்ரி” மந்திரத்தைப் பார்ப்போம்.

பிரம காயத்ரி மந்திரம் "ஓம் அங்உங் மகா லம்வம் நசிமசி

பிர்மதேவாய சுவாகா"

இந்த பிரம காயத்ரியை செபிப்பவர்களுக்கு சகல கலைகளில் தேர்ச்சியும் அட்டாங்க சித்தியும் கிடைக்கும் என்கிறார் அகத்தியர்.

எல்லாம் சரிதான்! இந்தக் காயத்ரி மந்திரங்களை எவ்வாறு செபிப்பது?

அதனையும் அகத்தியர் தனது நூலில் பின்வருமாறு விவரித்திருக்கிறார்.

இந்த இரகசிய காயத்ரி மந்திரங்களை தினமும் அந்தி சந்தி வேளைகளில் நூற்றியெட்டு தடவைகள் வீதம் ஒரு மண்டலத்திற்கு செபிக்க வேண்டும் என்கிறார்.  முக்கியமாக இந்த மந்திரங்களை உதடுகள் அசையாமல் உள்ளுக்குள் செபிக்க வேண்டும் என்கிறார். அவர் மேலும் ஒரு காயத்ரி மந்திரத்தினை ஒரு மண்டலகாலம் செபித்து முடித்தபின்னரே மற்றைய காயத்ரி மந்திரத்தினை செபிக்க வேண்டும் என்றும் சொல்கிறார்.

சித்தர்கள் அருளிய காயத்ரி மந்திரங்கள் பற்றிய தொடர் இத்துடன் தற்காலிகமாய் நிறைவுற்றது. பிரிதொரு தருணத்தில் சித்தர் பெருமக்கள் அருளிய மற்ற பிற காயத்ரி மந்திரங்களைப் பற்றி பகிர்ந்து கொள்கிறேன்.

குறிப்பு :-  ஒரு மண்டலம் - 48 நாட்கள். 

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

சித்தர்கள் அருளிய காயத்ரி மந்திரங்கள் சூட்சுமமானவை என்றும் இதனை பயன்படுத்துவதால் உண்டாகும் பலன்களைப் பற்றியும் முந்தைய  பதிவில் பார்த்திருந்தோம். இன்றைய் பதிவில் அகத்தியர் அருளிய “ருத்ர காயத்ரி” மற்றும் “விஷ்ணு காயத்ரி” மந்திரங்களைப் பற்றி பார்ப்போம். இந்த தகவல்கள் அகத்தியரின் “அகத்தியர் 12000” எனும் நூலில் இருந்து சேகரிக்கப் பட்டவை. 

அகத்தியர் அருளிய காயத்ரியை பார்ப்பதற்கு முன்னர் தற்போது புழக்கத்தில் இருக்கும் “ருத்ர காயத்ரி” மந்திரத்தை கீழே இணைக்கப் பட்டுள்ள காணொளியில் கேட்கலாம். இது சமஸ்க்ருத மொழியில் அமைந்தது.

இனி அகத்தியர் அருளிய ருத்ர காயத்ரி மந்திரத்தைப் பார்ப்போம்.

சித்தர்களால் காலங்காலமாய் மிகவும் இரகசியமாக பாதுகக்கப்பட்ட உருத்திர காயத்திரி மந்திரம் இதுதான்.

ருத்திர காயத்ரியை செபிப்பவர்களுக்கு அனைத்து நோய்களும் நீங்க் உடல் ஆரோக்கியமாக இருக்கும் என்கிறார் அகத்தியர்.

தற்போது புழக்கத்தில் இருக்கும் “விஷ்ணு காயத்ரி” மந்திரத்தை கீழே இணைக்கப் பட்டுள்ள காணொளியில் கேட்கலாம். இது சமஸ்க்ருத மொழியில் அமைந்தது.

இனி அகத்தியர் அருளிய “விஷ்ணு காயத்ரி” மந்திரத்தைப் பார்ப்போம்.

விஷ்ணு காயத்ரி மந்திரம் "ஓம் ஓங்ஸ்ரீங் மகா சம்வம் நசிமசி விஷ்ணுதேவாய சுவாகா" 

இந்த விஷ்ணு காயத்ரியை செபிப்பவர்களுக்கு புத்திர பாக்கியம் முதல் அனைத்துவகை செல்வங்களும் கிட்டும் என்கிறார் அகத்தியர்

அடுத்த பதிவில் பிரம்ம காயத்ரி மந்திரம் பற்றியும், இம் மூன்று காயத்ரி மந்திரங்களை எவ்வாறு செபிப்பது என்பது பற்றியும் பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

அனைவருக்கும் எனது உளம் நிறைந்த பொங்கல் திருநாள் வாழ்த்துக்கள். இன்றுதான் தமிழரின் புத்தாண்டு என கொண்டாடும் நண்பர்களுக்கு எனது இனிய தமிழ் புத்தாண்டு வாழ்த்துக்கள்.

எது எப்படியாக இருந்தாலும் உழவர் திருநாளான இந்த தைத் திருநாள், எம் தமிழ் சமூகத்தின் பெருநாள் எனபதில் நமக்குள் மாற்றுக் கருத்துகள் ஏதுமில்லை. இன்று துவங்கி இனி வரும் நாட்களில், நம் அனைவரது வாழ்விலும் அன்பும், அருளும், நலமும் வளமும் மலர எல்லாம் வல்ல குருநாதரை பணிந்து வணங்கிடுவோம்.

காயத்ரி மந்திரம் என்பது என்ன? அது வடமொழிக்கு மட்டும் உரியதா?, தமிழுக்கென காயத்ரி மந்திரங்கள் உண்டா?, அப்படி ஏதும் இருந்தால் அது என்ன? என்பது பற்றியெல்லாம் முன்னரே இங்கே பகிர்ந்திருக்கிறேன். அதன் நீட்சியாக சித்தர் பெருமக்கள் அருளிய மூன்று காயத்ரி மந்திரங்களை இனி வரும் நாட்களில் பார்க்க இருக்கிறோம். காயத்ரி மந்திரங்கள் தொடர்பான முந்தைய பதிவுகளை இந்த இணைப்பில் வாசிக்கலாம்.

காயத்ரி மந்திரங்கள் என்றால் அவை வடமொழியில் மட்டுமே உள்ளவை என்கிற பொதுக் கருத்து காலம் காலமாய் இருந்து வருகிறது. உலக மாதாவான காயத்ரியில் துவங்கி, அனேக பிற தெய்வங்களுக்கும் என தனித்துவமான காயத்ரி மந்திரங்கள் இன்று  நம்மிடையே பரவலாக புழக்கத்தில் இருக்கிறது. ஆனால் தமிழ் காயத்ரி மந்திரங்கள் ஏனோ நம் பார்வையில் அல்லது புழக்கத்தில் இல்லாமலே போய்விட்டது. அத்தகைய காயத்ரி மந்திரங்களை மீட்டெடுக்கும் ஒரு சிறு முயற்சியாகவே இந்த தொடரை பகிர்ந்து கொள்கிறேன்.

இனி வரும் நாட்களில் சூட்சுமம் நிறைந்த ருத்திர காயத்திரி, விஷ்ணு காயத்திரி, பிரம காயத்திரி என்கிற மூன்று காயத்ரி மந்திரங்களைப் பற்றியும் அதன் பிரயோகம் மற்றும் அதனால் விளையும் பலன்களை பார்க்க இருக்கிறோம். இந்த மந்திரங்கள் யாவும் அகத்தியர் அருளிய "அகத்தியர் 12000" என்ற நூலில் இருந்து சேகரிக்கப் பட்டவை.

இம் மூன்று காயத்ரி மந்திரங்கள் எத்தனை உயர்வானவை, அதன் சிறப்புகள் என்னென்ன என்பதை அகத்தியர் பின்வரும் பாடல்களில் விளக்குகிறார்.

இந்த மந்திரங்கள் மிகவும் சூட்சுமமானவை, இவற்றை உணர்ந்து செபிக்கிறவர்களின் உடல் நலம், மன நலம், செல்வ வளம் ஆகியவை சித்திக்கும் என்கிறார்.

ருத்திர காயத்திரி, விஷ்ணு காயத்திரி மந்திரங்களும், சிறப்புகளும் அடுத்த பதிவில்....

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

மூல நோய்கள் நீங்க தேரையர் அருளிய மற்றொரு மருத்துவ முறையினை இன்றைய பதிவில் பார்ப்போம். இந்த தகவல் தேரையர் வைத்திய சாரம் என்னும் நூலில் இருந்து சேகரிக்கப் பட்டது.

முப்பது பலம் கொட்டிக் கிழங்கை கொண்டு வந்து அதனை துண்டு துண்டுகளாக அரிந்து ஒரு சட்டியில் போட்டு, அது மூழ்கும் அளவு பசுவின் நெய் ஊற்றிக் கொள்ள வேண்டுமாம். பின்னர் அதனை அடுப்பில் ஏற்றி பக்குவமாக எரிக்க வேண்டுமாம். எரிக்கும் போது கிழங்கினை கிளறி விட்டு நன்கு பிரட்டி வேக வைத்து எடுத்து சேமித்துக் கொள்ளவேண்டுமாம். பின்னர் அதனை நன்கு அரைத்து தினமும் உண்ண வேண்டும் என்கிறார். இவ்வாறு உண்பதனால் இரத்த மூலம், சீழ் மூலம், உள் மூலம், வெளி மூலம், முளை மூலம் ஆகிய நோய்கள் குணமாகும் என்கிறார். இதற்கு பத்தியம் எதுவும் குறிப்பிடப்படவில்லை.

இத்துடன் மூல நோய் குறித்த நெடுந்தொடர் நிறைவுற்றது.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

மூல நோய்கள் நீங்க தேரையர் அருளிய பல வழிமுறைகளில் எளிய வைத்திய முறை ஒன்றினை இன்றைய பதிவில் பார்ப்போம்.இந்த தகவல் தேரையர் அருளிய “தேரையர் வைத்திய சாரம்” என்னும் நூலில் இருந்து சேகரிக்கப் பட்டது.

விச்சிப் பூவை சேகரித்து, அதனை நன்கு சுத்தம் செய்து பொடியாக நறுக்கிக் கொள்ள வேண்டும். நறுக்கிய விச்சிப் பூவினை ஒரு சட்டியில் போட்டு அது மூழ்கிடும் அளவு தூய்மையான பசுவின் நெய் ஊற்றிக் கொள்ள வேண்டும். பின்னர் சட்டியை அடுப்பில் ஏற்றி பக்குவமாக எரிக்க வேண்டும்.

பக்குவமாய் எரித்த பின்னர் கலவையை நன்கு பிரட்டி நாலைந்து உருண்டைகளாகச் செய்து கொள்ள வேண்டுமாம். பின்னர் காலை மாலை என இரண்டு உருண்டைகள் வீதம் உண்ண வேண்டும் என்கிறார். இவ்வாறு உண்பதனால் இரத்த மூலம், சீழ் மூலம், உள் மூலம், வெளி மூலம், முளை மூலம் ஆகிய நோய்கள் குணமாகும் என்கிறார். 

இதற்கு பத்தியம் எதுவும் குறிப்பிடப்படவில்லை.

குறிப்பு : விச்சிப்பூவிற்கு மலையஞ்சிவந்தி என்றொரு பெயரும் உண்டு. 

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

மூல நோய்கான தீர்வுகள் வரிசையில் இன்று வித்தியாசமான ஒரு தீர்வினை பார்க்க இருக்கிறோம். இந்த தகவல் தேரையர் அருளிய “தேரையர் வைத்திய சாரம்” என்னும் நூலில் இருந்து சேகரிக்கப் பட்டது.

நத்தையின் மேல் ஓடு ஒன்றினைக் கொண்டு வந்தது பழைய பாத்திரத்தில் போட்டு மேல் மூடி இட்டு அடுப்பில் ஏற்றி எரிக்க வேண்டுமாம். நன்கு எரிந்து, பாத்திரத்தில் இருந்து ஆவி வெளியே வரும் போது மூடியை நீக்கி விட்டு பாத்திரத்தின் மீது இரண்டு பலகையை இடைவெளி விட்டு வைத்துக் கொள்ள வேண்டும். இப்போது அந்த இடைவெளியின் வழியே வரும் ஆவியானது ஆசன வாயில் படும் படி உட்கார வேண்டுமாம்.

ஆசனவாயில் நத்தை ஓட்டின் ஆவியை பிடிக்கும் இதனை வேது பிடித்தல் என்றும் சொல்வர். இவ்வாறு தொடர்ந்து பத்து நாட்கள் ஆசனவாயில் ஆவி பிடித்து வந்தால் இரத்த மூலம், சீழ் மூலம், முளை மூலம் போன்றவைகள் குணமாகும் என்கிறார்.

ஆச்சர்யமான தகவல்தானே!

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

மூல நோய்க்கான தீர்வுகள் வரிசையில் இன்று தேரையர் அருளிய மற்றுமொரு தீர்வினையே பார்க்க இருக்கிறோம். இந்த தகவல் தேரையர் அருளிய “தேரையர் வைத்திய சாரம்” என்னும் நூலில் இருந்து சேகரிக்கப் பட்டது.

முடக்கொற்றான், மூக்கரட்டை, காட்டுக் கருணைக் கிழங்கு, மெருகன் கிழங்கு, களக்கொட்டி வேர் இவைகளில் வகைக்கு ஒரு பலம் வீதம் எடுத்து ஒன்றாக சேர்த்து கல்வத்தில் இட்டு நன்கு மைபோல அரைத்தெடுத்துக் கொள்ள வேண்டுமாம். ஒரு மண் பாண்டத்தில் ஐந்து ஆழாக்கு சிற்றாமணக்கு எண்ணெய் ஊற்றி, அதில் முன்னர் அரைத்த கலவையை இட்டு நன்றாகக் கலக்கி அதனை அடுப்பில் ஏற்றி மெழுகு பதத்திற்கு வரும் வரையில் நன்கு காய்ச்சி சேமித்துக் கொள்ள வேண்டுமாம். 

பின்னர் தினமும் இதிலிருந்து அரை பலம் வீதம் எடுத்து ஒரு மண்டலத்திற்கு உண்ண வேண்டுமாம் இவ்வாறு உண்பதனால் அனைத்து வகையான மூல நோய்களும் குணமாகும் என்கிறார். இதற்கு பத்தியம் எதுவும் குறிப்பிடப்படவில்லை.

குறிப்பு :- ஒரு பலம் என்பது தற்போதைய அளவுகளில் 35 கிராம் ஆகும். ஒரு ஆழாக்கு என்பது தற்போதைய அளவுகளில் நூற்றி அறுபத்தியெட்டு மில்லி லிட்டர்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

மூல நோய் என்பது என்ன?, அதன் கூறுகள் யாவை?, நவீன அலோபதி மருத்துவமும், பழமையான நமது சித்த மருத்துவமும் இந்த நோயை எவ்வாறு அணுகி தெளிவுகளையும், தீர்வுகளையும் முன் வைத்திருக்கின்றன என்பதைப் பற்றியெல்லாம் கடந்த இரு வாரங்களாக பார்த்து வருகிறோம். அந்த வரிசையில், இந்த நெடுந்தொடரின் மூன்றாவது பகுதியாக மூல நோய்க்கு நமது சித்தர் பெருமக்கள் அருளிய சில தீர்வுகளை இந்த வாரம் பார்க்க இருக்கிறோம்.

தேரையர் அருளிய “தேரையர் வைத்திய சாரம்” எனும் நூலில் காணக் கிடைக்கும் தீர்வு ஒனறினை இன்று பகிர்ந்து கொள்கிறேன்.

ஆமணக்கு எண்ணெய் இருபது பலம், எலுமிச்சம் பழச்சாறு, குமரிச்சாறு, மணத்தக்காளி சாறு என ஒவ்வொன்றிலும் பத்து பலம் வீதம் எடுத்து ஒரு மண் பானையில் ஊற்றிக் கொள்ளவேண்டுமாம். நற்சீரகம் அரை பலம் எடுத்து அதனை நன்கு அரைத்து, மண் பானையில் உள்ள கலவையுடன்  சேர்த்து நன்றாகக் கலக்கி, பானையை அடுப்பில் ஏற்றி மெழுகு பதத்திற்கு வரும் வரையில் நன்கு காய்ச்சி எடுத்து சேமித்துக் கொள்ள வேண்டுமாம். 

தினமும் காலை வேளையில் சூரியனை வணங்கி, இந்த கரைசலில் ஒரு பலம் வீதம் உண்ண வேண்டுமாம். இவ்வாறு தொடர்ந்து உண்பதனால் சீத மூலம், இரத்த மூலம், கடுப்பு, ஆசனக் கடுப்பு, உட்காய்ச்சல், உள் மூலம், வெளி மூலம் போன்ற நோய்கள் அனைத்தும் நீங்கிவிடும் என்கிறார் தேரையர். 

இந்த மருந்தை உட்கொள்ளும் போது பத்தியமாக புகை, புளி, உப்பு, பழைய சாதம், மாட்டு இறைச்சி, மீன் ஆகியவற்ரை நீக்கி, தயிர், மோர், நெய், வென்னீர் விட்டு பிசையப்பட்ட சாதம் ஆகியவைகளை மட்டுமே உணவில் சேர்த்துக் கொள்ள வேண்டும் என்கிறார்.

குறிப்பு :- ஒரு பலம் என்பது தற்போதைய அளவுகளில் 35 கிராம் ஆகும்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

சித்தர் பெருமக்கள் பகுத்துக் கூறிய இருபத்தியோரு வகையான மூல நோய்களில் இதுவரை பதின்நான்கு வகைகளைப் பற்றி முந்தைய இரண்டு பகுதியில் பார்த்தோம். அந்த வகையில் கடைசி ஏழு வகைகளான மேகமூலம், பவுத்திரமூலம், கிரந்தி மூலம், குத மூலம், புறமூலம், சுருக்கு மூலம், சவ்வு மூலம் பற்றி இன்றைய பதிவில் பார்ப்போம்.

இந்த தகவல்கள் யாவும் யூகிமுனி அருளிய “வைத்திய சிந்தாமணி” எனும் நூலில் இருந்து சேகரிக்கப் பட்டவை.

இந்த வகை பாதிப்பு உள்ளவர்களுக்கு பிறப்புறுப்பில் இருந்து மேகம் ஒழுகுமாம். குதத்திலிருந்து இரத்தம் ஒழுகுமாம். அதிக சத்துடன் கழிச்சலுண்டாகுமாம். சிறுநீர் கழியும் போது எரிச்சல் உண்டாகுமாம். தலை வலிக்குமாம். உடல் எங்கும் திமிர்த்துப் போகுமாம். சிறுநீர் இனிப்புச் சுவையுடன் காணப்படுமாம். இந்த குணங்கள் காணப்பட்டால் அது மேக மூலம் என்கிறார்.  

பவுத்திரத்தில் கட்டி உண்டாகுமாம். அடிக்கடி சிறுநீர் வெளியேறுமாம். கால் கை கனப்புண்டாகுமாம். குதம், குய்யம் ஆகிய இடங்களில் கோழியைப் போல சூடு எப்போதும் இருந்துகொண்டே இருக்குமாம். மாம்பூ போல முளைகள் காணப்படுவதுடன் அவை கோவைப்பழம் போல சிவந்து காணப்படுமாம்.  இந்த குணங்கள் காணப்பட்டால் அது பவுத்திர மூலம் என்கிறார்.  

ஆண் குறியில் புண் உண்டாகுமாம். கால் கை கடுப்புண்டாகுமாம். குதத்துக்குள் புண்ணாகவே இருக்குமாம். கொடிக்கொடியாக முளையுண்டாகி சீழும் இரத்தமும் துர்நீரும் வெளியாகுமாம். தீபோல எரிச்சல் தரும். கடுப்புடன் மலம் கெட்டியாக வறண்டு வெளியாகுமாம். மலத்துவரம் கீற்று கீற்றாக வெடித்து இருக்குமாம். இந்த குணங்கள் காணப்பட்டால் அது கிரந்தி மூலம் என்கிறார்.

இந்த வகை பாதிப்பு உள்ளவர்களுக்கு மூங்கில் குருத்துபோல முளை வெளி நோக்கி இறங்கியிருக்குமாம். உள்ளே தள்ளிவிட்டால் உள்ளே போய்விடுமாம். சீழோடு இரத்தம் சேர்ந்து வெளியாகுமாம். வயிறு அதிகமாக கனத்துக் கொள்ளுமாம். கால் கை அதப்பு தருமாம். அடிக்கடி நாவறண்டு தண்ணீர் குடிக்க வேண்டியிருக்குமாம். பிட்டம் அதிமாக வலிக்குமாம். கோபமுண்டாகும். இந்த குணங்கள் காணப்பட்டால் அது குதமூலம் என்கிறார்.

குதத்தில் இருந்து எண்ணெய் போலவும், தண்ணீர் போலவும் கடுப்புடன் சீழ் வடியுமாம். தினவு எடுக்குமாம், திமிர்வு உண்டாகுமாம். சிறுசிறு சிரங்காக மேலெல்லாம் சொறியுண்டாகுமாம். ஆசனத்தில் சிறு சிறு கட்டிகள் தோன்றியிருக்குமாம். முகம் வாட்டமுடன் காணப்படுமாம். இந்த குணங்கள் காணப்பட்டால் அது புறமூலம் என்கிறார்.

புதுமையா யாசனத்தைச் சுருக்கிக் கொண்டு

பெருங்குடலில் வலியோடு பொரும லாகும்

கதுமையாய் குதந்தன்னிற் றடிப்புண் டாகும்

கழலுமே தண்ணீரும் ரத்தந் தானும்

வெதுமையாய் வெவ்வனல்போ லழன்று காணும்

வேற்றுடம்பாய்த் தான்வெளுத்து வெறிப்புண் டாகும்

பதுமைபோல் தேகமெங்கு மசவு கூடாப்

பண்பான சுருக்கென்ற மூலந் தானே

ஆசனவாய் சுருக்கிக் கொள்ளுமாம். பெருங்குடலில் வலியுடன் பொருமல் ஏற்படுமாம். குதத்தில் தடிப்பு உண்டாவதுடன் அனல் போல அழன்று காணப்படுமாம். தண்ணீரும் இரத்தமுமாய் வெளியேறுமாம்.  உடல் வெளுத்து வெறிப்புண்டாகுமாம். தேகம் முழுதும் அசைக்க முடியாது போகுமாம். இந்த குணங்கள் காணப்பட்டால் அது சுருக்குமூலம் என்கிறார்.

முதுகுத் தண்டில் ஆரம்பித்து தொப்புள்வரை தாமரைப்பூ போல மலர்ந்து காரமாக அடிவயிற்றில் வலியினை உண்டாகுமாம்.  சவ்வுபோல ஆசனவாயினைச் சுற்றி காணப்படுமாம். அத்துடன் எந்நேரமும் சீழும் நீருமாகக் கசிந்து கொண்டிருக்குமாம். இந்த குணங்கள் காணப்பட்டால் அது சவ்வுமூலம் என்கிறார்.

நவீன அலோபதி மருத்துவம் உள் மூலம், வெளி மூலம் என இரண்டே பிரிவுகளாய் கூறும் ஒன்றினை நமது முன்னோர்கள் இருபத்தியோரு பிரிவாக பகுத்து கூறியிருப்பதை இது வரை பார்த்தோம். இத்துடன் இந்த தொடரின் இரண்டாம் பகுதி நிறைவடைகிறது.

இனி வரும் நாட்களில் இந்த மூல நோயினை குணமாக்கிட சித்தர் பெருமக்கள் அருளிய சில வைத்திய முறைகளைப் பற்றி பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

சித்தர் பெருமக்கள் பகுத்துக் கூறிய இருபத்தியோரு வகையான மூலநோய்களில் இன்று ஆழி மூலம், தமரக மூலம், வாதமூலம், பித்த மூலம், சிலேத்தும மூலம், தொந்த மூலம், வினைமூலம் பற்றிய தகவல்களையும், அறிகுறிகளையும் பார்ப்போம்.

இந்த தகவல்கள் யாவும் யூகிமுனி அருளிய “வைத்திய சிந்தாமணி” எனும் நூலில் இருந்து சேகரிக்கப் பட்டவை.

இந்த வகை பாதிப்பில் நீண்ட வள்ளிக் கிழங்கு போன்று ஒரே முளையாகக் காணப்படுமாம். நீரும், சீழும், இரத்தமும் கலந்து வெளியேறுவதுடன் மலம் சிக்குமாம். காரமான உணவுகளை உடல் ஏற்றுக் கொள்ள மாட்டாதாம். உடல் பலவீன மடையுமாம்.  உடல் பலவீனத்தினைப் பொறுத்து மரணம் ஏற்படவும் சாத்தியமுண்டாம். இந்த குணங்கள் காணப்பட்டால் அது ஆழிமூலம் என்கிறார்.

இந்த வகை பாதிப்பு உள்ளவர்களுக்கு அபானத்தில் உலக்கைப் பூண்போலவும், முற்றிய தாமரைப்பூ போலவும் மூளையிருக்குமாம், மலத்துடன் இரத்தம் வெளியேறுமாம், தினவேற்படுமாம். வயிறு இரைந்து மலம் நீர்த்தன்மையாக வெளியேறுமாம். வயிறு ஊதி பசியில்லாமல் மந்தமாய் காணப்படுமாம். மேல் மூச்சுண்டாவதுடன் அசதியும் ஏற்படுமாம்.  இந்த குணங்கள் காணப்பட்டால் அது தமரக மூலம் என்கிறார்.

இந்த வகை பாதிப்பு உள்ளவர்களுக்கு குதம் கோவைப் பழம் போல சிவந்து காணப்படுமாம். அடப்பம்பூ போல முளை வளர்ந்து கருப்பாய் மிருதுவாக இருக்குமாம். கடுப்பு, தினவு, குத்தல், திமிர்த்தல் ஆகியன காணப்படுமாம். அபானத்தில் ஆதிக மயிர் முளைக்குமாம். மலம் கறுத்து அதிகமாக திரண்டு இருக்குமாம். வயிற்றில் குடலுக்குள் வலியெடுப்பதுடன் அதிக தலைவலியும் உண்டாகுமாம். இந்த குணங்கள் காணப்பட்டால் அது வாதமூலம் என்கிறார்.

இந்த வகை மூலநோய் உள்ளவர்களுக்கு தலைவலி அதிகம் உண்டாகுமாம். பருத்திக் கொட்டை போலவும், நெல்போலவும் முளையுண்டாகுமாம். மலம் சிக்கி உருண்டு உருண்டு, மாவுருண்டைபோல திரி திரியாய் இரத்தமும் சீழும் கலந்து வெளியேறுமாம். குதம் கடுத்து எரிவுண்டாகுமாம். தாகமும் வியர்வையும் உண்டாகுமாம், தலைவலி அதிகம் இருப்பதனால் கோபமுண்டாகுமாம். உடலைப் பலவீனமமாக இருக்குமாம். இந்த குணங்கள் காணப்பட்டால் அது பித்தமூலம் என்கிறார்.

குதத்தில் வெள்ளை நிறத்தில் முளையுண்டாகுமாம். எந்த நேரமும் அதிக எரிவுண்டாகுமாம். கடுப்புடன் சீழும் தண்ணீரும் சேர்ந்து அதிக வலியுடன் மலம் வெளியேறுமாம். சிறுநீர் அதிக சூட்டுடன் வெளிவருமாம். சுக்கில நட்டமும், பாண்டு நோயும் உண்டாகும். உண்ணும் உணவின் சுவையினை உணர்ந்து கொள்ள முடியாதிருக்குமாம். இந்த குணங்கள் காணப்பட்டால் அது சிலேத்தும மூலம் என்கிறார்.

குதம் இறுகிக் கோழியில் சூடு இருப்பதைப் போல் சூடாயிருக்குமாம். நடக்க இயலாது இருக்குமாம். வயிறு அதிக பொருமலுடன் காணப்படுமாம். அதிக வியர்வையும் மிக நடுக்கமும் உண்டாகுமாம். தாகம் அதிகமாக இருக்குமாம். வயிறு பேதியாவதுடன் உடல் அட்டைபோல் சுருங்கிப் போகுமாம். இந்த குணங்கள் காணப்பட்டால் அது தொந்த மூலம் என்கிறார்.

திடுக்கிட்டுச் சோறுசெரி யாமை யாகும்

தீபனந்தா னில்லாமற்பி ளித் தே க்காகும்

அடுக்கிட்ட அடிவயிற்றிற் குற்ற லுண்டாம்

ஆங்காரக் கோபமொடு மலமுங் கட்டும்

கடுக்கிட்ட கைகாலு மோச்ச லாகும்

கனமாக வயிறிரைந்து காந்த லுண்டாம்

வெடுக்கிட்டு நரம் பெல்லா மிசிவு மாகும்

மிகக்கடுக்கும் வினைமூல விபரந் தானே

உண்ணும் சோறு செரிக்காமல் புளித்த ஏப்பம் உண்டாகும். அடிவயிற்றில் குத்தல் உண்டாகுமாம். மலமும் கட்டுமாம், கைகால் ஓச்சலாகுமாம். வயிறு இரைந்து காந்தல் உண்டாகும். நரம்பெல்லாம் வலிப்பு தோன்றுமாம். இந்த குணங்கள் காணப்பட்டால் அது வினைமூலம் என்கிறார்.

நாளைய பதிவில் அடுத்த ஏழு வகையான மேகமூலம், பவுத்திரமூலம், கிரந்தி மூலம், குத மூலம், புறமூலம், சுருக்கு மூலம், சவ்வு மூலம் பற்றி பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..

சித்தர் பெருமக்கள் இருபத்தியோரு வகையான மூல நோய் இருப்பதாய் பகுத்துக் கூறியிருப்பதை நேற்றைய பதிவில் பார்த்தோம். அவை முறையே...

நீர்மூலம், செண்டுமூலம், மூளைமூலம், சிற்று மூலம், வரள் மூலம், இரத்த மூலம், சீழ்மூலம், ஆழி மூலம், தமரக மூலம், வாதமூலம், பித்த மூலம், சிலேத்தும மூலம், தொந்த மூலம், வினைமூலம், மேகமூலம், பவுத்திரமூலம், கிரந்தி மூலம், குத மூலம், புறமூலம், சுருக்கு மூலம், சவ்வு மூலம் என்பன ஆகும்.

இன்றைய பதிவில் முதல் ஏழு வகை  மூல நோய்களைப் பற்றியும் அதற்கான அறிகுறிகளைப் பற்றியும் பார்ப்போம். இந்த தகவல்கள் யாவும் யூகி முனி அருளிய “வைத்திய சிந்தாமணி” எனும் நூலில் இருந்து சேகரிக்கப் பட்டவை.

இந்த வகை மூலநோய் பாதிப்புள்ளவர்களுக்கு தொப்புளில் அதிக வலியிருக்குமாம். கீழ்வயிற்றை சுருட்டி பொருமிக் கொள்ளுமாம். மலம் வறண்டு போகுமாம். வாயில் நீர் ஊறுமாம். வாய்வு வெளியேறும் போது நுரைபோல காணப்படுவதுடன் உடுத்தியிருக்கும் ஆடைகளிலும் அவை படுமாம். அடிக்கடி மலம் வருவது போலிருக்குமாம். ஆனால் மலமாக வெளியேறாமல் நீராக போகுமாம். இந்த குணங்கள் காணப்பட்டால் அது நீர்மூலம் என்கிறார்.

இந்த வகை மூலநோயானது கருணைக்கிழங்கின் முளைபோல தோன்றி, அது மூன்று நாளில் கன்றிப்போய் வலிக்குமாம். காரசிகிச்சை செய்தால் விழுந்து விடுமாம். இரத்தமும் தண்ணீரும் வருமாம். மலம் இறுகிப் போகுமாம். இரைச்சலுண்டாகுமாம். ஆசனவாயை சுருக்கிக் கொள்ளுமாம். இந்த குணங்கள் காணப்பட்டால் அது செண்டு மூலம் என்கிறார்.

ஆசனத்தில் கடுப்புண்டாகுமாம். ஆசன வாய் தடித்து திரட்சியாகி எரிவுண்டாகுமாம். அடிவயிறு கல் போலாகுமாம். ஆசனவாய் மிகச்சுருங்கி தினவெடுக்குமாம். மலம் கழிக்க உட்கார்ந்தால் இரத்தம் பீறிடுமாம். இரைச்சல் அதிகமுண்டாகுமாம். ஏப்பம் அதிகமாகுமாம், மஞ்சள் முளைபோல கட்டி எழும்புமாம். மலம் தீய்ந்துபோகுமாம். இந்த குணங்கள் காணப்பட்டால் அது முளைமூலம் என்கிறார்.

வண்மையா யுடம் பெரியும் மயக்க மாகும்

வயிறுதான் பளபளென்னும் வலுவாய் குற்றும்

இண்மையாய் குறுகுறென்றே இரைச்ச லாகும்

இசிவுடனே பொருமலாயி ளைப்பு மாகும்

திண்மையாய்ச் சித்துமுளை பலவுண் டாகும்

தேகமெங்கும் வெளுப்பாகுஞ் செயலுங் காணும்

வெண்மையாய் வெளுத்துமே பசியி ராது

மேனி கண்ணுஞ் சிற்றுமூல மிடுக்குந் தானே.

இந்த வகை மூல நோய் பாதிப்பில் உடல் எரிவும் மயக்கமும் உண்டாகுமாம், வயிறு பளபள என்று குத்தலெடுக்குமாம், குறுகுறென்று இரைச்சலும் உண்டாகுமாம். பொருமலுடன் இளைப்பும் உண்டாகுமாம். ஆசன வாயில் சிறிய முளைகள் பல உண்டாகுமாம். தேகம் முழுதும் வெளுத்து காணப்படுவதுடன் பசியும் இருக்காது என்கிறார். இந்த குணங்கள் காணப்பட்டால் அது சிற்றுமூலம் என்கிறார்.

இந்த வகையில் மலம் இறுகிக் கொள்வதுடன் இரத்தம் துளித்துளியாய் விழுமாம். உடல் உலர்ந்து சூடாக இருக்குமாம். மிகவும் பேசி சண்டையிட வைக்குமாம். ஆசனவாயின் உள் இருக்கும் முளை வெளியில் தென்படாது என்றும் நாள் ஆக ஆக உடல் பலம் குறையுமாம். இந்த குணங்கள் காணப்பட்டால் அது வரள் மூலம் என்கிறார்.

தொப்புளில் வலித்து சிறு கதிர்போல இரத்தம் பீறிட்டு வெளியேறுமாம். உடல் வற்றி வெளுத்துப் போகுமாம். கைகால்கள் அசந்து போகுமாம். சோபையை உண்டாகுமாம். தாங்க முடியாத தலைவலியும் உண்டாகுமாம். மயக்கம அதிகமாகி கீழே விழுவதுடன் கண்கள் மஞ்சள் நிறமாக காணப்படுமாம். இந்த குணங்கள் காணப்பட்டால் அது இரத்த மூலம் என்கிறார்.

குதம் கடுத்து எரிச்சல் உண்டாகுமாம். நாற்றத்துடன் சீழும் தண்ணீரும் வெளியேறுமாம். உடல் மெலிந்து, வெளுத்து மஞ்சளாகுமாம். வாயில் நீர் அதிகமாகுமாம், அதிக தூரம் நடக்க முடியாமல் இருப்பதுடன் சிறுநீர் மஞ்சளாக  வெளியேறுமாம். இந்த குணங்கள் காணப்பட்டால் அது சீழ்மூலம் என்கிறார்.

அறிவியலும், தொழில் நுட்பமும் வளராத ஒரு காலகட்டத்தில் நமது முன்னோர்கள் ஒரு நோயைப் பற்றி இத்தனை தீர்க்கமாகவும், தெளிவாகவும் பகுத்துக் கூறியிருப்பது ஆச்சர்யமும், பெருமையும் கொள்ளத் தக்கது. நாளைய பதிவில் அடுத்த ஏழு வகையான ஆழி மூலம், தமரக மூலம், வாதமூலம், பித்த மூலம், சிலேத்தும மூலம், தொந்த மூலம், வினைமூலம் பற்றி பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க..