அகமருந்துகள் 21 - 32

Author: தோழி / Labels: ,


சித்த மருத்துவத்தில் வரையறுக்கப் பட்டுள்ள 32 அகமருந்துகள் பற்றிய விளக்கங்களை பார்த்து வருகிறோம். அந்த வரிசையில் இன்று கடைசி 12 அகமருந்துகளைப் பற்றிய தகவல்களை பார்ப்போம்.

21. மெழுகு - இது இரண்டு வகைப்படும்.

அரைப்பு மெழுகு - பாதரசம் சேர்ந்த சரக்குகள், உப்புகள் முதலியவைகளைத் தனியாகவோ கடைச் சரக்குகள் சேர்த்தோ அரைத்து மெழுகு பதத்தில் எடுத்துக் கொள்வது.

சுருக்கு மெழுகு - ரசச் சரக்குகள், பாஷாணங்கள் முதலிய வகைகளை மூலிகைகளின் சாறு, நெய் முதலியவைகளினால் சுருக்குக் கொடுத்து அவை இளகி மெழுகு பதமாக வரும் பொழுது எடுத்து கல்வத்தில் இட்டுப் பதமாக அரைத்து எடுத்துக் கொள்வது.

22. குழம்பு - சாறுகள், சர்க்கரை, சரக்குப் பொடிகள் முதலியவைகளைக் காய்ச்சி கொழகொழப்பான பக்குவத்தில் எடுத்துக் கொள்வது.

23. பதங்கம் - ரசம் அல்லது ரசக்கலப்புள்ள மருந்துகளை உப்பும் செங்கல் தூளும் இட்ட மண் சட்டியில் போட்டு மேலேமடு சட்டியை வைத்துச் சீலைமண் செய்து எரிக்க வேண்டும். தேவையான நேரம் வரை எரித்த பின் பிரித்து மேல்சட்டியில் படந்திருப்பதை எடுத்து வைத்துக் கொள்வது. 

24. செந்தூரம் - உலோகம், பாஷாணம் முதலியவைகளை இலைச்சாறு, திராவகம், செயநீர் ஆகியவைகளினால் அரைத்துக் கொண்டு செய்வது. புடம் போட்டோ, எரித்தோ, வறுத்தோ, அரைத்தோ, வெயிலில் காய வைத்தோ சிவப்பாகும் பதத்தில் எடுத்துப் பொடித்து வைத்துக் கொள்வது.

25. பற்பம் - உலோகம், பாஷாணம் முதலியவைகளை இலைச்சாறு, புகைநீர், செயநீர் ஆகியவைகளினால் அரைத்துப் புடம் போட்டோ, வறுத்தோ, எரித்த ஊதியோ வெளுக்குபடிச் செய்து எடுத்துக் கொள்வது.

தங்க பற்பத்தின் நிறம் மட்டும் மஞ்சளாக இருக்கும்.

26. கட்டு - பாஷாணங்களைப் புகைநீர், செயநீர், சாறு, தேன், நெய் முதலிய ஏதாவது ஒன்றினால் சுருக்குக் கொடுத்து (கெட்டியாக) கட்டிக் கொள்வது. இதை மாத்திரைக்கல் என்றும் அழைப்பர்.

27. உருக்கு - பாஷாணங்கள், உலோகங்கள், மற்ற சரக்குகளைச் சேர்த்து மூசையிலிட்டு மேலே மூடி மண்சீலை செய்து அடுப்புக்கரித் தீயில் வைத்து ஊதி இளகச் செய்து (உருக்கி) ஆறவைத்து எடுப்பது.

28. களங்கு - பாதரசம் முதலிய சரக்குகளை சாறு, நீர் முதலியவைகளில் சுருக்குக் கொடுத்து புடம் இட்டுக் கட்டியாக்கிக் கொண்டு, பிறகு அடுப்புக்கரித் தீயில் வைத்து ஊதி மணியாக்கி உருக்கித் தங்கம் நாகமும் சேர்த்து ஆறவைத்து எடுப்பது.

29. சுண்ணம் - தேவையானவைகளை அரைத்து, மூசையிலிட்டு சீலை செய்து உலர்த்தி, கரி நெருப்பிலிட்டு ஊதி எடுத்து ஆறவைத்துப் பூத்த பின் எடுத்துக் கொள்வது.

30. கற்பம் -  இலை, வேர், கடைச்சரக்கு, உலோக உபரச சத்துக்கள் முதலியவைகளை கூறப்பட்ட நாள் அளவு, பத்திய முறைப்படிஉண்டுவர வேண்டிய மருந்து.

31. சத்து - காந்தம், இரும்புத்தூள் மற்ற உபரசம் முதலியவைகளோடு சில பாஷாணங்களையும் சேர்த்து செய நீரால் அரைத்து உலர்த்திக் கொண்டு,  சீலை செய்து மூசையிலிட்டு மூன்று முறை ஊதி எடுக்கக் கிடைப்பது.

32. குருகுளிகை - வாலை ரசத்துடன் சில சரக்குகள் சேர்த்துக் கட்டி மணிமணியாகச் செய்து கொள்வது.

அடுத்த பதிவில் புற மருந்துகளைப் பற்றி பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...



Post a Comment

2 comments:

வரலாற்று சுவடுகள் said...

அவ்வப்போது தான் கருத்திட முடிகிரதென்றாலும் வாசிப்பதை ஒருபோதும் தவறவிடுவதில்லை

இந்த தொடர் பதிவும் நிறைய விசயங்களை எனக்கு தெரியப்படுத்துகிறது நன்றி சகோ!

shimbu said...

anbu, thozhi "nadham" enral enna? Pls...

Post a Comment