அகத்தியர் பூரண சூத்திரம் - 216...

Author: தோழி / Labels:


சித்தர் பெருமக்களின் அரிய நூல்களை மின் நூலாக தொகுத்து பகிரும் எனது முயற்சியில் பதின்நான்காவது நூலாக அகத்தியர் அருளிய "அகத்தியர் பூரண சூத்திரம் - 216" என்கிற இந்த நூலை உங்களின் மேலான பார்வைக்கு சமர்ப்பிப்பதில் பெருமிதம் கொள்கிறேன்.

பதினென் சித்தர்களில் மூத்தவராகவும், தெய்வத் தன்மைகள் பொருந்திய அவதார புருஷராகவும் அறியப் படும் அகத்தியர், சித்த வைத்திய முறையின் பிதாமகன் என்றால் மிகையில்லை.இல்லறத்திலும் நல்லறம் பேணிட முடியும் என்பதை உணர்த்திய பெருமகனார் அகத்தியர்.

இத்தனை பெருமை கொண்ட சித்த புருஷரின் இந்த நூலானது அவரது பரந்து பட்ட அனுபவத்தின் தொகுப்பாக விளங்குகிறது. குண்டலினியின் ஆறு ஆதாரங்கள் முதல் சுண்ண வகைகள், மருந்துகள், கற்பவகைகள், மைகள், வாதவித்தைகள், குளிகைகள் போன்ற பல அரிய தகவல்களையும் அதன் முறைகளையும் தெளிவாக விளக்கி கூறியிருக்கிறார்.

இந்த நூலின் பெருமைகளைப் பற்றி அவரே இவ்வாறு குறிப்பிடுகிறார்.

"பொய்யாமல் இருக்கவென்றால் இந்நூல் வேணும்
    புகலரிய தீட்சைக்கும் யோகத்துக்கும்
மெய்யான கற்பமுதல் காயசித்தி
    விருதான வாதவித்தை குளிகை சித்தி
வகையான கைமுறைகள் வாத தீட்சை
    கருவான மறைப்பென்ற சவுக்காரப் போக்கு
உய்யாமல் நூல்களிலே ஒளித்த பாகம்
    ஒளியாமலெ டுத்துரைத்தேன் உண்மையாமே"        

தமிழ் அறிந்த அனைவரும் பயன்பெற வேண்டும் என்கிற நோக்கில் இந்த அரிய நூலினை மின் நூலாக தொகுத்திருக்கிறேன்.. தமிழர்கள் அனைவரும் போற்றி பாதுகாத்திட வேண்டிய நூல்களில் இதுவும் ஒன்று. எனவே இந்த மின் நூலினை பார்வையிடும் நண்பர்கள் தாங்கள் அறிந்தவர், தெரிந்தவர் என்ற பாகுபாடு இல்லாமல் அனைவருடன் இதை பகிர்ந்து கொள்ள வேண்டுகிறேன்.

நண்பர்களே!,தொடரும் உங்களின் அன்பிற்கும், ஆதரவிற்கும், மேலான ஆலோசனைகளுக்கும் நன்றிகள் பல....

எனது மேலான குருவினை பணிந்து இந்த நூலை உங்கள் பார்வைக்கு வைக்கிறேன்.


என்றும் நட்புடன்

தோழி..

www.siththarkal.com

தொடர்புக்கு:-
siththarkal@gmail.com

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சோழ மன்னனும், கணபதி கோவிலும்!

Author: தோழி / Labels:


சித்தர் பெருமக்களின் பாடல்களின் ஊடே அவர்கள் காலத்தைய நிகழ்வுகளும் குறிப்புகளாய் பதிவாகி இருக்கின்றன. அப்படியான தகவல்களை முந்தைய பல பதிவுகளில் பகிர்ந்திருக்கிறேன். அந்த வரிசையில் இன்றும் சுவாரசியமான ஒரு வரலாற்றுத் தகவல்.

இந்த பாடல் தேரையர் அருளிய தேரையர் காவியம் என்ற நூலில் காணப் படுகிறது. மதுரைக்கு வடக்கே இருப்பதாக கருதப் படும் ஒரு கோவிலைப் பற்றிய குறிப்புதான் இந்த பாடல்கள்.

கோடியென்ற மதுரைக்கு வடக்கேயப்பா
கெடியான யோசனைதான் பத்துக்கப்பால்
ஆலென்ற விருட்சமது ஒன்றுண்டப்பா
நலமான கணேசனென்ற கோயிலொன்று
ஆடியடா அங்கொருவ ராருமில்லை
அப்பனே யருள்பால சோழனென்று
தேடியல்லோ தர்மத்தைச் செய்யவென்று
திரும்பினான் கணேசர்பதம் வணங்கினானே.


வணங்கியல்லோ ஆலயத்தை முடித்தானப்பா
வகையான தர்மமது மெத்தவப்பா
இணங்கியல்லோ கணேசருக்கு கிருபைவந்து
ஈஸ்பரிக்குத் தான்வணங்கி யியம்பிச்சொன்னார்
கணங்கியல்லோ யீசருக்குத் உரைத்திட்டப்பா
காட்டிவிட்டார் சிதம்பரத்தை கைக்கொண்டப்பா
அணங்கியல்லோ சிதம்பரத்தை கைக்கொண்டப்பா
அப்பனே வாலையைத்தா னீய்ந்திட்டாரே.


ஈய்ந்திட்டார் கணபதியும் நந்தியப்பா
யிகபரமா யறுகோண சுப்பிரமணியம்
போந்திட்டார் சண்டேசுரர் வீரர்கூட
புகழான வடுகனுடன் மாயைபீசம்
ஊத்திட்டார் புவனையுடன் திரிபுரையின்பீசம்
உத்தமனே மேருவைத்தான் கொடுத்தார்பாரு
ஏந்திவிட்டா ரத்தனையு மிரண்டுகையால்
இகபரமாய் குளிகையது கேட்டானப்பால்


கேழ்க்கையிலே கணபதியுங் குளிகைவாங்கி
கொடுத்துவிட்டார் சோழனுட பாக்கியந்தான்
கேழ்கையிலே அவனுடைய நாமங்கேளு
கடிதான கணேசனென்ற சோழனப்பா
வேழ்க்கையிலே மேருவில்தான் பூசைமெத்த
விதிமுறையாய்க் கைவரிசை யதிகம்பாரு
ஆழ்கையிலே யஷ்டாங்க யோகமெல்லாம்
அப்பனே மெத்தக்கூடும் சென்றுபாரே.

மதுரை நகரில் இருந்து வடக்கு பக்கமாக பத்து யோசனை தூரத்தில் ஒரு ஆலமரம் இருக்கின்றதாம். அங்கே ஒரு கணபதியின் கோவில் இருந்ததாம் அந்த கோவிலை கவனிக்க யாரும் இல்லையாம். அப்போது அந்த வழியே வந்த தர்ம சிந்தனை கொண்ட சோழ மன்னன் கோவிலைக் கண்டு கணபதியின் பாதம் வணங்கினானாம்.

அப்படிக் கணபதி பாதம் வணங்கிய சோழ வேந்தன் பின்னாளில் அந்த கோவிலை பெரிதாக்கி சிறப்பாக கட்டிமுடித்தானாம். அந்த மன்னனின் தான தர்மங்கள் எல்லாவற்றிலும் மனம் மகிழ்ந்திருந்த கணபதியானவர், ஈஸ்வரியையும், ஈசனையும் வணங்கி வேண்டினாராம். ஈசன் சிதம்பர சக்கரத்தையும், வாலை தாயின் சக்தியும், சுப்ரமண்யர், சண்டேசுரர் மற்றும் வடுகன் ஆகியோரின் பீஜ மந்திரங்களும் கொண்ட சக்திவாய்ந்த மேரு யந்திரத்தை மன்னனுக்கு கொடுக்கும் படி நந்தியிடம் கொடுத்தாராம். நந்தியும் அந்த யந்திரத்தை மன்னனுக்கு கொடுக்க அந்த யந்திரத்தை வாங்கிய சோழமன்னன் அதை அந்த கணபதி கோவிலிலேயே பிரதிஷ்டை செய்தானாம். பிரதிஷ்டை செய்த மன்னன் கணபதியிடம் இகபர குளிகை தரும்படி வேண்டினானாம்.

அவன் வேண்டுதலுக்கு இணங்கிய கணபதியும் சோழ அரசனுக்கு இகபர குளிகையை கொடுத்தாராம். அந்த பாக்கியத்தை பெற்றதால் சோழ வேந்தனுக்கு கணேச சோழன் என்ற பெயர் வழங்கலாயிற்றாம். இந்த கோவிலில் அந்த மேரு யந்திரத்திற்கு விதிமுறைப்படி சிறப்பாக பூசைகள் நடை பெறுகின்றன என்று சொல்லும் தேரையர் அங்கு சென்று தியானம் செய்பவர்களுக்கு அட்டங்க யோகமெல்லாம் சிறப்பாக கைகூடும் என்கிறார். 

மதுரைக்கு வடக்கே பத்து யோசனை தூரத்தில் இருக்கும் அல்லது இருந்த கணபதி கோவில் பற்றியும், கணேச சோழன் பற்றியும் தகவல் தெரிந்தவர்கள் இங்கே பகிர்ந்து கொள்ளலாமே!


சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


பெண்கள்!... மார்பகங்கள்!... தேரையர்!

Author: தோழி / Labels: , ,


சித்தர்களின் பாடல்களின் ஊடே பயணிக்கும் போது, சில பாடல்கள் தரும் ஆச்சர்யங்கள் நம்புவதற்கு அரிதானதாகவும், அவற்றின் சாத்திய அசாத்தியங்கள் குறித்த சந்தேகங்களும் வருவதுண்டு. இம் மாதிரியான பாடல்களின் ஊடே பொதிந்திருக்கும் தகவல்கள் யாவும் மேலதிக ஆய்வுகளுக்கானவை. அந்த வகையில் இன்று தேரையர் வைத்திய சாரம் என்கிற நூலில் காணப்படும் ஒரு தகவலை பகிர்ந்து கொள்கிறேன்.

பெண்களின் மார்பகம் என்பது பாலூட்டும் ஒரு உறுப்பு. தாய்மையின் அம்சம். பரம்பரை உடல் வாகு மற்றும் உண்ணும் உணவினைப் பொறுத்து ஒவ்வொருவருக்கும் மார்பகங்களின் அளவுகள் வேறுபடுகிறது. எனினும் எல்லோருக்கும் வலது பக்க மார்பகத்தை விடவும் இடது பக்க மார்பகத்தின் அளவு சற்று பெரியதாக இருக்கும். இந்த நிஜங்களைத் தாண்டி வாழ்வியல் சூழலில் தாய்மையின் அம்சமான மார்பகங்கள் அழகியல் சார்ந்த ஒன்றாக அணுகப் படுகிறது. 

பெண்களின் மார்பகங்களை பெரிதாக்குகிறோம், சிறியதாக்குகிறோம், ஆழகுபடுத்துகிறோம் என்கிற பெயரில் நவீன மருத்துவம் பல்வேறு அறுவை சிகிச்சைகளையும், வைத்திய முறைகளையும் முன் வைக்கின்றன. எனினும் இத்தகைய சிகிச்சைகள் பெண்களின் உடல் நலத்துக்கு எதிரானது, காலப் போக்கில் பக்க விளைவுகளையும் உண்டாக்கி விடுகிறது. இதனை பெண்கள் உணர்ந்திட வேண்டியது அவசியம்.

எல்லாம் சரிதான், மேலே சொன்ன விவரங்களுக்கும் இந்த பதிவுக்கும் என்ன தொடர்பு என்கிற கேள்வி இன்னேரத்துக்கு உங்களுக்கு வந்திருக்கக் கூடும்.

தேரையரும் கூட பெண்களின் மார்பகங்களை பெரிதாக்கவும், சிறியதாக்கவும் ஒரு வைத்திய முறையினை கூறியிருக்கிறார்.

ஆச்சர்யமாக இருக்கிறதல்லவா!

தேரையர் வைத்திய சாரம் என்கிற நூலில் வரும் அந்தப் பாடல் பின்வருமாறு.....

கொள்ளப்பா மூஞ்சூரை நீரதிலே விட்டு
            குதித்தாவி நீந்திடும்போ திருதுண்டாக
மெள்ளப்பா கத்தியினால் வீசிப்போடு
              மிதந்ததுவும் முழுகினதும் வெவேறே கண்டு
தள்ளப்பா பசுஞ்சாணம் கவசம் செய்து
               தவறாமல் புடமிடவே நீறிப் போகும்
விள்ளப்பா ப்றணியில் புரிவாய் செய்துவைத்து
              மெல்லியர்கள் கொங்கையிலே தடவிப்பாரே.


பாரடா அழுத்திய துண்டத்தின் பற்பம்
        பாங்காகப் பூசிடவே சுருங்கிப் போகும்
வேரடா மிதந்த துண்டு பறபந்தன்னை
         மேலிட்டுப் பூசிடவே பெருத்துக் காணும்
மாரடா இப்படித்தான் செய்து பாரு
          மகத்தான என்குருவின் முறை பொய்யாகாது
சாரடா சிவசக்தி பூசை தன்னை
          தவறாது செய்திட்டால் சாதிப்பாயே.

மூஞ்சுறு என்னும் எலியைப் பிடித்து தண்ணீரில் போட்டால் அது குதித்துத் தாவி நீந்துமாம். அப்போது அதனை கத்தியினால் இருதுண்டாக வெட்டிட வேண்டுமாம். அப்ப்டி வெட்டிய உடன் ஒரு துண்டானது நீர்ல் மிதக்குமாம். மற்றது மூழ்கி விடுமாம். இப்போது இந்த இரு துண்டுகளையும் தனித் தனியே பசுஞ் சாணத்தினால் கவசம் செய்து புடமிட வேண்டும் என்கிறார் தேரையர். இப்படி புடமிட்டால் அது எரிந்து நீறாகி விடுமாம்.இவற்றை தனித் தனியே சேகரம் செய்து கொள்ள வேண்டும்.

இப்போது நீரில் மூழ்கிய பாகத்தினை புடமிடக் கிடைத்த நீறினை பெண்ணின் மார்பில் பூசினால் அந்த மார்பகம் சுருங்கி விடுமாம். அதே போல நீரில் மிதந்த மூஞ்சூறின் உடல் பாகத்தை புடமிடக் கிடைத்த நீறினை பெண்ணின் மார்பில் பூச அந்த மார்பகம் பெருத்து விடுமாம். இந்த வைத்திய முறையைச் செய்யும் போது தவறாமல் சிவசக்தியை வணங்கி செய்திட வேண்டும் என்கிறார்.

பல லட்சம் ரூபாய் செலவும், சிகிச்சைக்குப் பின்னர் பக்க விளைவுகளையும் கொண்டு தரும் நவீன வைத்திய முறைக்கு சவால் விடும் ஒரு வைத்திய முறையினை நமது முன்னோர்கள் பல நூறு ஆண்டுகளுக்கு முன்னரே அருளியிருக்கின்றனர். இந்த முறையின் சாத்திய அசாத்தியங்கள் ஆய்வுக்கும், மேம்படுத்துதலுக்கும் உட்பட்டவை என்றாலும் கூட நமது முன்னோரின் அறிவின் திறம் எத்தகையதாக இருந்திருக்கிறது என்பதற்கு இம் மாதிரியான பாடல்கள் உதாரண்மாய் இருக்கிறது.

ஆர்வமுள்ளோர் இது தொடர்பாக மேலதிக ஆய்வுகளை செய்து இந்த வைத்திய முறையினை மேம்படுத்திடலாமே!

நாளை வேறொரு தகவலுடன் சந்திக்கிறேன்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


உணவும், உடலும்!

Author: தோழி / Labels: ,


மனிதன் உட்பட எல்லா உயிரினங்களுக்கும் உயிர்த்திருக்க காற்றைப் போல உணவும் பிரதானம். இந்த உணவின் மகத்துவத்தைப் பற்றி சித்தர் பெருமக்கள் விரிவாகவே தங்களின் பாடல்களில் கூறியிருக்கின்றனர். இதற்கு உணவே மருந்து, மருந்தே உணவு என்ற முதுமொழியை உதாரணமாகச் சொல்லலாம்..

நாம் உட் கொள்ளும் உணவானது நமது உடலில் எப்படிப் போய் சேர்கிறது என்பதைப் பற்றி அகத்தியர் தனது வல்லாதி எனும் நூலில் பின் வருமாறு கூறியிருக்கிறார்.

சொன்னோமே யின்னமொரு சூட்சங் கேளு
           சொல்லுவேன் பொசித்ததெல்லா மாறு பங்காய்
முன்னேதான் மலத்திலொன்று மூத்திரத்தி லொன்று
           மூளுமே தசையிலொன்று விந்தி லொன்று
தன்னேதான் மூளைதனி லொன்று சேரும்
            சார்ந்திடுமே உதிரத்தி லொன்று மாக
மன்னேதான் சயகாச யேக ரோகி
            வலுவான அதிசாரம் வந்த பேர்க்கே.


வந்தபெருங் கிராணி குன்மம் எலும்பு ருக்கி
             வாங்காத கரத்தோர்களின் சாத்திய ரோகி
பந்தமுறத் தின்றதொன்று மாறி லப்பா
             பாலகனே நோயருந்தும் பாரு பாரு
உந்தனுட விந்தழிந்தால் யெல்லாம் போச்சு
              உண்டதெல்லாம் பாழாச்சு உறவும் போச்சு
விந்துதனை இழந்துபல பிணிக்குள் ளாகி
              மெலிந்துகெட்டுப் போகாமல் விள்ளு வேனே.

அதாவது நாம் உண்ணும் உணவின் சாரமானது ஆறு பங்குகளாய் பிரிகிறதாம். அதில் ஒரு பங்கு கழிவாகி மலமாகவும், மற்றொரு பங்கு மூத்திரமாகி விடுகிறதாம். மீதமுள்ள நாலு பங்கில் ஒரு பங்கானது நமது தசையிலும், விந்து/நாதத்தில் ஒரு பங்கும், மூளையில் ஒரு பங்கும், நமது இரத்தத்தில் ஒரு பங்குமாகச் சேர்கிறதாம்.

இந்த விகிதங்களின் படி உணவின் சாரம் பிரிந்து வந்தால் உடல் ஆரோக்கியமாக இருக்குமாம். இதில் ஏதேனும் மாறுதல் ஏற்படும் போதே நமது உடல் ந்லம் கெடுகிறது என்கிறார் அகத்தியர்.கிராணி, குன்மம், எலும்புருக்கி நோய், சுரநோய் ஆகிய நோய்கள் உண்டாகும் என்கிறார். இதனால் உடலில் உள்ள விந்தும் அழிந்து விடுமாம். அப்போது மேலதிக நோய்களுக்கு ஆளாகி விடுவோமாம். இதனால் நாம் உட் கொண்ட உணவு அனைத்தும் வீணாகிவிடும் என்கிறார் அகத்தியர்.

எல்லாம் சரிதான், உணவின் சாரம் பிரியும் விகிதம் கெடும் போது அதை எப்படி சரி செய்வது?

அதற்கும் அகத்தியர் ஒரு தீர்வினை நல்கியிருக்கிறார். பூரண வல்லாதி சூரணத்தை பக்குவமாய் செய்து சாப்பிட்டு வர இந்தப் பிரச்சினைகள் நீங்கி உடல் ஆரோக்கியத்துடன் இயங்கிட முடியும் என்கிறார். சித்த மருத்துவர்களை அணுகினால் இந்தப் பூரண வல்லாதி சூரணம் தயாரித்துக் கொடுப்பார்கள்.

நாளை வேறொரு தகவலுடன் சந்திக்கிறேன்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


ஹோரை என்றால் என்ன?

Author: தோழி / Labels: ,


பழந் தமிழர்களின் ஒரு நாள் என்பது அறுபது நாழிகையாக பிரிக்கப் பட்டிருந்தது. அதாவது ஒரு நாளானது தினமும் காலை சூரிய உதயத்தில் இருந்து மறுநாள் காலை சூரிய உதயம் வரையான இருபத்தி நான்குமணி நேரமே ஒரு முழு நாள் ஆகும். 

இந்த ஒரு நாளின் அறுபது நாழிகை நேரத்தில் சில நாழிகைகள் சூரியன், சந்திரன், செவ்வாய், புதன், குரு, சுக்கிரன், சனி ஆகிய ஏழு கிரகத்தினதும் தனித்துவமான ஆதிக்கதில் இருக்குமாம். அந்த நேரம் அந்த கிரகத்தின் ஹோரை என்று அழைக்கப்படும். ஹோரை என்பதை ஓரை என்றும் அழைப்பர். நிழல் கிரகங்களான ராகுவிற்கும் கேதுவிற்கும் ஹோரை குறிக்கப்படவில்லை. இன்னமும் எளிமையாக சொல்வதானால் அந்த நேரங்கள் அந்த குறிப்பிட்ட கிரகத்திற்கானது.

ஒவ்வொரு நாளும் துவங்கும் போது எந்த கிரகத்தின் ஹோரையுடன் துவங்குகிறது என்றும் வரையறுத்து வைத்திருக்கின்றனர். அதன் படியே அந்த நாளின் மற்ற ஹோரைகள் கணக்கிடப் படுகிறது.

ஞாயிறு - சூரியன் ஹோரை
திங்கள் - சந்திரன் ஹோரை
செவ்வாய் - செவ்வாய் ஹோரை
புதன் - புதன் ஹோரை
வியாழன் - குரு ஹோரை
வெள்ளி - சுக்கிரன் ஹோரை
சனி - சனி ஹோரை

மேலும் நாளின் நெடுகில் எந்த ஹோரை நடைபெறும் என்பதை கீழ் வரும் அட்டவணையில் அறியலாம்.. 

எல்லாம் சரிதான் தினமும் சூரிய உதயத்தை எப்படி அறிவது?

பஞ்சாங்கத்தில் தினமும் சூரிய உதய நேரத்தை பார்க்கலாம். அப்படி பார்க்க வசதி இல்லாதவர்களுக்கு உதவிட நிறைய இணைய தளங்கள் இருக்கின்றன. எனது மற்றய தளமான சித்த ஜோதிடம் என்னும் தளத்தின் வலதுபக்க மேல் மூலையில் சூரிய உதயம் முதல் அன்றைய திதி, நட்சதிரம், ராகுகாலம், எமகண்டம், சுப நேரம் போன்ற அனைத்தையும் தினசரி காலையில் பார்த்துக் கொள்ளலாம். அவை இலங்கை இந்திய நேரப்படியே குறிக்கப்படும். இதைக் கொண்டு எளிதாக கணக்கிட்டுக் கொள்ளலாம்.


இந்த அட்டவணைப் படி சனி ஹோரை நேரத்தில் முந்தைய சனிப் பெயர்சி பரிகாரப் பதிவில் குறிப்பிட்டிருக்கும் அரிதான சனி கவசத்தினை பாராயணம் செய்து வந்தால் சனி பகவானின் பேரருளுக்கு பாத்தியமாகலாமாம்.


சனிகவசம் மற்றும் ஹோரை பற்றிய குறிப்புகளை அனைவரும் பயன்படுத்திக் கொள்ளும் வகையில் PDF கோப்பாக மாற்றியிருக்கிறேன். தேவையுள்ளவர்கள் இந்த இணைப்பில் தரவிரக்கிக்கொள்ளலாம். தேவையுள்ளவர்களுக்கு இந்த இணைப்பினை பகிர்ந்திடுமாறு வேண்டுகிறேன்.

இத்துடன் சனிப் பெயர்ச்சி பற்றிய தொடர் நிறைவடைந்தது.

நாளைய பதிவில் வேறொரு தகவலுடன் சந்திக்கிறேன். 

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனி பகவானும், பரிகாரங்களும்.

Author: தோழி / Labels:

வணிக மயமாகிவிட்ட இன்றைய வாழ்க்கைச் சூழலில் பரிகாரம் என்ற வார்த்தைக்கு பிரச்சினைகளுக்கான நிரந்தர தீர்வு என்பதாகவே கற்பிக்கப் பட்டு விட்டது. இதன் அடிப்படையில்தான் ஒரு பிரச்சினைக்கு அவரவர் செல்வ நிலைகளுக்கு ஏற்ப பல விதமான பரிகாரங்கள் இருப்பதாக சொல்லிக் கொண்டிருக்கின்றனர்.

என்னுடைய வாசிப்பனுவத்தின் படி, பரிகாரம் என்பது ஒரு போதும் பிரச்சினைகளுக்கு தீர்வாகவோ, மாற்றாகவோ இருக்க முடியாது. ஏனெனில் பரிகாரம் என்பது ஒரு வகையான ஆறுதல் மட்டுமே. 

இருட்டில் நடக்கிறவனுக்கு கை விளக்குப் போலவும், கரடு முரடான பாதையில் நடக்கிறவனுக்கு காலணி போலவும்தான் இந்த பரிகாரங்கள் பயன்படும். மற்றபடி விதிக்கப் பட்ட பாதையில் அவரவர் பயணித்தே ஆக வேண்டும். எனவே பிரச்சினைகள் தீர்ந்துவிடும் என நினைத்து பெரும் பொருட் செலவில் பரிகாரங்களை செய்வதற்கு முன்னர் இதை மனதில் கொள்ள வேண்டுகிறேன். 

சனி பகவானின் பெயர்ச்சியினால் நமக்கு உண்டாகும் நன்மைகளை மேம் படுத்திக் கொள்ளவும், தீமைகளின் பாதிப்பினை குறைத்துக் கொள்ளவுமே இந்த பரிகாரங்கள் கூறப் படுகின்றன.சித்தர் மரபிலும் சரி, அதைத் தாண்டிய பிற ஞான மரபிலும் சரி, இறைவனை மனதில் இருத்தி துதித்திருப்பது மட்டுமே எல்லா இடர்களுக்கும் பரிகாரமாய் சொல்லப் படுகிறது. புறவழிபாடுகளையோ, சடங்குகளையோ சித்தரியலும் சரி, ஞான மரபும் சரி நிராகரிக்கின்றன. 

அந்த வகையில் சில தியான மந்திரங்களையும், ஸ்லோகங்களையும் இன்று பகிர்ந்து கொள்கிறேன்.

தியான பாடல் (தமிழ்)..

"சங்கடந் தீர்க்கும் சனி பகவானே
மங்களம் பொங்க மனம் வைத்தருள்வாய்
சச்சரவின்றிச் சாகா நெறியில்
இச்செகம் வாழ இன்னருள் தருவாய் போற்றி"


தியான சுலோகம் (சமஸ்கிருதம்)..

"நீலாஞ்ஜன ஸமாபாஸம்
ரவிபுத்ரம் யமாக்ரஜம்|
ச்சாயா மார்த்தாண்ட ஸம்பூதம்
தம் நமாமி ஸநைச்சரம்||"

சனி காயத்ரி

"ஓம் காகத்வஜாய வித்மஹே 
கட்க ஹஸ்தாய தீமஹி
தந்நோ மந்த: ப்ரசோதயாத்||"

இவை தவிர சனிபகவானின் கவசம் ஒன்று எனது பாட்டனாரின் குறிப்புகளில் இருந்து தேடி எடுத்தேன். மிகவும் அரிதான இந்த கவசத்தை எழுதியவர் யாரெனத் தெரியவில்லை. ஆனால் ஒவ்வொரு சனிக் கிழமைகளிலும் சனி கோரை நேரத்தில் இந்த கவசத்தை பாராயணம் செய்தால் சனிபகவானின் பேரருளுக்கு பாத்திரமாகலாம் என்ற குறிப்பு எழுதப் பட்டிருக்கிறது. 


அந்த பாடல் இதுதான்....


சனி கவசம்..


காப்பு

தேவரெண் டிசைக்கதிபர் சித்தரொடு கிம்புருடர்
மூவர் முனிவர் முதலோரை - மேவியுறுந்
தாரணிந்த மார்பன் சனிபகவான் கதை புகலக்
காரணிந்த யானைமுகன் காப்பு.


ஆதிவேதாந்தமுதல் அரியஞானம்
ஐந்தெழுத்தி னுட்பொருளை அயன்மாலோடும்


சோதிசிற்றம் பலத்திலாடி நின்ற
சுடரொளியை நீ பிடித்த தோஷத்தாலே


பாதிமதி சடைக்கணிய அரவம் பூணப்
பதியிழக்கச் சுடலைதனிற் பாடியாடச்


சாதியிலா வேடனெச்சிற் தின்னவைத்தாய்
சனியனே காகமேறுந் தம்பிரானே


வேலவனை வேங்கைமர மாக்கிவைத்தாய்
விறகுகட்டுச் சொக்கர்தமை விற்கவைத்தாய்


மாலினியை யுரலோடு கட்டுவித்தாய்
வள்ளிதனைக் குறவறது வனத்தில் வைத்தாய்


காலனைமார்க் கண்டணுக்கா அரனுதைத்த
காரணமும் நீ பிடித்த கருமத்தாலே


சாலவுனை யான்றொழுதே னெனைத்தொடாதே
சனியனே காகமேறுந் தம்பிரானே


மஞ்சுதவ ழயோத்தியில்வாழ் தசரதன்றன்
மக்களையும் வனவாசமாக்கிவைத்தாய்


பஞ்சவர்கள் சூதினால் பதியிழந்து
பஞ்சுபடும் பாடைவர் படச்செய்வித்தாய்


எஞ்சலிலா வரிச்சந்திரன் பெண்டை விற்றே
இழிகுலத்தி லடிமையுற இசையவைத்தாய்


தஞ்சமென வுனைப்பணித்தே னெனைத்தொடாதே
சனியனே காகமேறுந் தம்பிரானே


அண்டமாயி ரத்தெட்டு மரசுசெய்த
அடல்சூர பத்மனையு மடக்கிவைத்தாய்


மண்டலத்தை யாண்டநளச் சக்ரவர்த்தி
மனைவியொடு வனமதனி லலையச்செய்தாய்


விண்டலத்தை பானுகோ பன்றன்னாலே
வெந்தணலாய்ச் சூரரை வெருவச் செய்தாய்


தெண்டனிட்டே னெந்நாளு மெனைத்தொடாதே
சனியனே காகமேறுந் தம்பிரானே.


அண்டர்கோன் மேனியிற்கண் ணாக்கிவித்தாய்
அயன்சிரத்தை வயிரவனா லறுக்கவைத்தாய்


திண்டிறகொள் கெளதமனா லகலிகைதான்
சிலையாகவேசாப முறவேசெய்தாய்


தண்டரள நகையிரதி மாரன்றன்னைச்
சங்கரனார் நுதல்தவிழியிற் றணல்செய்வித்தாய்


சண்டமிலாதுணைத் தொழுதே னெனைத் தொடாதே
சனியனே காகமேறுந் தம்பிரானே


பாருலவு பரிதியைப்பல் லுதிரவைத்தாய்
பஞ்சவர்க்குத் தூதுபீதாம் பரனைவைத்தாய்


தாருலவும் வாலிசுக் ரீவன்றம்மைத்
தாரையினாற் றீராத சமர்செய்வித்தாய்


சூரனெனு மிலங்கைரா வணன் றன் தங்கை
சூர்ப்பனகி மூக்குமுலை துணிசெய்வித்தாய்


தாரணியு மணிமார்பாவெனைத் தொடாதே
சனியனே காகமேறுந் தம்பிரானே


சுக்ரன்றன் கண்ணிழந்தான் லங்கையாண்டு
துலங்கும்ரா வணன் சிரங்கண் டிக்கவீழ்ந்தான்


மிக்கபுக ழிரணியென்றான் வீறழிந்தான்
விளங்குதிரி புராதிகளும் வெந்துமாண்டர்


சக்காத்தா லுடலறுந்தான் சலந்தரன்றான்
தாருகாசூரனுமே சமரில் மாண்டான்


தக்கன்மிகச் சிரமழிந்தா நிந்தோழத்தால்
சனியனே காகமேறுந் தம்பிரானே.


அந்தன ஐங்கரங்கொம் பறவேசெய்தாய்
அறுமுனிவர் மனைவிகள்கற் பழியச்செய்தாய்


சந்திரன்றன் கலையழிந்து தழைக்கச் செய்தாய்
சங்கரனைப் பிச்சைதா னெடுக்கச் செய்தாய்


தந்திமுகாச் சூரனுயிர் தளரச் செய்தாய்
சாரங்க தரங்கரத்தை தறிக்கச்செய்தாய்


சந்ததமு முனைப்பணிவே சிறைசெய்வித்தாய்
தேவர்களைச் சூரனாற் சிறைசெய்வித்தாய்


மாதுதுரோ பதைதுயிலை வாங்குவித்தாய்
மகேச்சுரனை யுமைபிரியும் வகைசெய்வித்தாய்


போதிலயன் றாளிற்றளைப் பூட்டிவித்தாய்
பொதிகையினிலகத்தியனை பொருந்தச் செய்தாய்


தாதுசேர் மலர்மார்பா வெனைத்தொடாதே
சனியனே காகமேறுந் தம்பிரானே.


அப்பர்தமை கருங்கல்லோ டலையிற்சேர்த்தாய்
அரனடியின் முயலகனை யடங்கச்செய்தாய்


செப்புமா ணிக்கர் தமைச் சிறையிலிட்டாய்
ஸ்ரீராமனை மச்சவுரு வெடுக்கச்செய்தாய்


ஒப்பிலனு மான்வாலி லொளிதீயிட்டாய்
ஒலிகடலி னஞ்சையான் உண்ணவைத்தாய்


தப்பிலா துனைதொழுதே னெனைத்தொடாதே
சனியனே காகமேறுந் தம்பிரானே


நீரினையுண்ட டெழுமேக வண்ணா போற்றி
நெடுத்தபத்தி லறுகமலக் கண்ணா போற்றி


சூரியன்றன் றவத்தில்வந்த பாலா போற்றி
துலங்குநவ கிரகத்துண் மேலா போற்றி


காரியென் பெயர்களுப காரா போற்றி
காசினியிற் கீர்டத்திபெற்ற தீரா போற்றி


மூரிகொளு நோய்முகமா முடவா போற்றி
முதுமகனின் முண்டகநாள் போற்றி போற்றி


சூரியன்சோ மன்செவ்வாய் சொற்புதன் வியாழன் வெள்ளி
காரியனி இராகு கேது கடவுள் ரொன்பா னாமத்


தாரியல் சக்கரத்தை தரித்திரர் பூசித்தாலும்
பாரினிற் புத்திர ருண்டாம் பாக்கியம் நல்குந்தானே.

              சனி கவசம் முற்றும்.

இந்த அரிய பாடலை எழுதியவர் யாரென தெரிந்தவர்கள் கூறினால் நன்றியுடையவளாக இருப்பேன். 

இந்நேரத்துக்கு சனி கோரை நேரம் என்பது என்னவென்ற கேள்வி உங்களுக்கு வந்திருக்கும். அது தனியே விவரிக்க வேண்டிய ஒன்று, அந்த தகவல்களுடன் நாளை சந்திக்கிறேன்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனிப் பெயர்ச்சி பலன்கள் - தனுசு முதல் மீனம் வரை..

Author: தோழி / Labels:


சனிபகவான் கன்னி ராசியில் இருந்து துலா ராசிக்கு மார்கழி 04ம் திகதி அன்று 57 நாழிகை 26 வினாடி அதாவது 21.12.2011 காலை 05 மணி 20 நிமிடத்திற்கு பெயர்ந்திருக்கிறார்.துலா ராசியானது சனிபகவானுக்கு உச்சஸ்தானம் என்று சொல்லப்படுகிறது இந்த நிலைக்கு வருவதன் மூலம் அவர் பலம் மிகுந்தவராகி விடுவார் என்கிறது சோதிட நூல்கள்.

அடுத்த இரண்டரை ஆண்டுகளுக்கு தனுசு, மகரம், கும்பம், மீனம் ஆகிய நான்கு ராசிகளுக்கான பலன்களை இன்று பார்ப்போம்.


தனுசு 

நட்சத்திரங்கள் - முலம், பூராடம், உத்திராடம் 1ஆம் பாதம் வரை

தனுசு ராசிக்காரர்கள் இயல்பில் நல்ல எண்ணங்களைக் கொண்டவர்களாக இருப்பார்களாம். இத்தகைய ராசிக்கு பத்தாம் இடமான கன்னியில் இருந்த சனி பகவான் பெயர்ந்து பதினோராவது வீடான துலாம் ராசிக்கு வந்திருக்கிறார். இது வரை இருந்த துயரமெல்லாம் பனி போல விலகும் காலமிது. இதனை சாதக சிந்தாமணி பின் வருமாறு கூறுகிறது.

"பதினோரா மிடதில் காரி
     பாங்குடன் வந்து விட்டால் 
அதிகாரப் பதவி கூடும்
     சுகமாக அமையும் வாழ்வே"

இந்த கால கட்டத்தில் குடும்பத்தில் ஒற்றுமை மேலோங்கும், பண வரவு உண்டாகும். இந்த சனிப் பெயர்ச்சியினால் சுப பலன்களை பெறும் ராசிகளில் தனுசு ராசியும் ஒன்று. இந்த வாய்ப்பினை நழுவ விடாது பலன் பெற்றிட எல்லாம் வல்ல குருவருள் துணை நிற்கட்டும்.

எனினும் சித்திரை முதல் ஆறு மாதங்கள் கவனத்துடன் செயல்பட வேண்டும்.


மகரம் 

நட்சத்திரங்கள் - உத்திராடம் 2ஆம், 3ஆம், 4ஆம் பாதம், திருவோணம், அவிட்டம் 1ஆம், 2ஆம் பாதம் வரை

மகர ராசிக்காரர்கள் ஆன்மீகத்தில் நாட்டமுள்ளவர்களாக இருப்பார்களாம். இத்தகைய மகர ராசிக்கு ஒன்பதாம் வீடான கன்னி ராசியில் இருந்த சனி பகவான் தற்போது பத்தாம் வீடான துலாம் ராசிக்கு பெயர்ந்திருக்கிறார். சோதிட நூல்கள் இதனை ஜீவனச் சனி என்கிறது. மகர ராசி நாதனான சனி பகவான் தனது நட்புக் கிரகமான சுக்கிரன் வீட்டில் உச்சம் பெற்றிருப்பதால் பெரிய அளவிலான பாதிப்புகள் இருக்காது.

"சூரிய மைந்தன் காரியும்
       சுகமாய் தசமமிடம் வந்தால்
வரவு பெருகும் வளம்பெருகும்
       வதுமை புரியும்யோ கம்வரும்"

எனினும் எண்ணம், சொல், செயல் ஆகியவற்றில் நிதானம் கடை பிடிக்காவிடில் அதற்கான பலன்களை அனுபவிக்க வேண்டிவரும்.இடமாற்றமும் தொழில் மாற்றமும் முன்னேற்றங்களும் உண்டாகும். அத்துடன் அலைச்சலும் அகால போஜனமும் உண்டாகுமாம். என்றாலும் கூட இந்த சனி பெயர்ச்சியால் அதிக நற் பலன்களைப் பெறும் ராசிகளில் இதுவும் ஒன்று.


கும்பம் 

நட்சத்திரங்கள் - அவிட்டம் 3ஆம், 4ஆம் பாதம் , சதயம், பூரட்டாதி 1ஆம், 2ஆம், 3ஆம் பாதம் வரை

"நவமதில் காரி வந்தால்
     நாளும் நற்செல்வம் சேரும்
அவமரி யாதை நீங்கும் 
     அகிலமே வணங்கிப் போற்றும்"

கும்ப ராசிக்காரர்கள் எத்தகைய சூழலிலும் நிதானமாக சிந்திக்கும் ஆற்றல் பெற்றவர்களாய் இருப்பார்களாம்.இத்தகைய கும்பராசிக்கு ராசியின் அதிபதியான சனி பகவான் எட்டாம் வீடான கன்னியில்  இருந்து பெயர்ந்து ஒன்பதாவது ராசியான துலாம் க்கு பெயர்ந்திருக்கிறார். இதுவரை இருந்து வந்த அஷ்டம சனி விலகியிருப்பது ஆறுதல் தரும் அம்சம். இதுவரை இருந்த அவல நிலை இனி மாறும்.

இல்லறம் நல்லறமாகும். சிறுசிறு பிரச்சனைகளை தந்தாலும் பொதுவில் நல்ல நற்பலன்களையே சனிபகவான் தருவார். தகுதிக்கு மீறிய செயல்களில் இறங்காதிருத்தல் உத்தமம்.


மீனம் 

நட்சத்திரங்கள் - பூரட்டாதி 4ஆம் பாதம் , உத்திரட்டாதி, ரேவதி.
       
மீன ராசிக்காரர்களுக்கு ஏழாம் இடமான கன்னி ராசியில் கண்டகச் சனியாக இருந்தவர் பெயர்ந்து எட்டாம் இடமான துலாம் ராசிக்கு அஷ்டமச் சனியாக வந்திருக்கிறார். இது இதுவரை இருந்த துயர நிலையை அதிகரிப்பதாகவே இருக்கும். எனவே இனி வரும் நாட்களில் தேவைக்கும் அதிகமான நிதானமும், ஒழுங்குடன் கூடிய செயல் பாடுகளுமே கடுமையான துயரத்தில் இருந்து காப்பாற்றும். 

"அட்டம ஸ்தானம் தன்னில்
     கடுமையுடன் காரி வந்தால்
எருமை யேறிய எமனும் 
      நேரில் வந்தது போலாமே"

உற்றார், உறவினர், நண்பர்கள் என சமூகத்தினரின் அவதூறுக்கும், அவமதிப்புக்கும் ஆளாகும் வாய்ப்புகள் உண்டு. கடுமையான மன அழுத்தங்கள் உண்டாகும் என்பதால் இந்த கால கட்டத்தில் நல்லோர் அருகாமையும், அறிவுரையும் கேட்டு நடப்பது நல்லது.

இத்துடன் சனிப் பெயர்ச்சி பலன்கள் முற்றிற்று.

இது வரை நாம் பார்த்த பலன்களை வாசித்த பின்னர் உங்கள் மனதில் நற் பலன்களை மேலும் அதிகப் படுத்தி நலமடையவோ அல்லது தீய பாதிப்புகளைக் குறைத்துக் தம்மை பாதுகாத்துக் கொள்ளவோ ஏதும் பரிகாரங்கள் இருக்கின்றனவா என்ற கேள்வி இன்னேரத்திற்கு வந்திருக்கும். 

அது பற்றி நாளைய பதிவில் பார்ப்போமே!


சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனிப் பெயர்ச்சி பலன்கள் - சிம்மம் முதல் விருச்சிகம் வரை..

Author: தோழி /


சனிபகவான் கன்னி ராசியில் இருந்து துலா ராசிக்கு எதிர்வரும் மார்கழி 04ம் திகதி அன்று 57 நாழிகை 26 வினாடி அதாவது 21.12.2011 காலை 05 மணி 20 நிமிடத்திற்கு பெயர்ச்சியாகின்றார். துலா ராசியானது சனிபகவானுக்கு உச்சஸ்தானம் என்று சொல்லப்படுகிறது இந்த நிலைக்கு வருவதன் மூலம் அவர் பலம் மிகுந்தவராகி விடுவார் என்கிறது சோதிட நூல்கள்.

அடுத்த இரண்டரை ஆண்டுகளுக்கு சிம்மம், கன்னி, துலாம், விருச்சிகம் ஆகிய நான்கு ராசிகளுக்கான பலன்களை இன்று பார்ப்போம்.


சிம்மம் 

நட்சத்திரங்கள் -  மகம், பூரம், உத்திரம் 1ஆம் பாதம் வரை

சிம்ம ராசிக்காரர்கள் கடின உழைப்பாளிகளாகவும், விடா முயற்சியுடையவர்களாகவும் இருப்பார்களாம். இத்தகைய சிம்ம ராசிக்காரர்களுக்கு இரண்டாம் இடத்தில் இருந்த சனி பகவான் பெயர்ந்து மூன்றாம் இடமாகிய துலாம் ராசிக்கு செல்கிறார். இந்த இடம் சிம்ம ராசிக்காரர்களுக்கு மிகவும் அனுகூலமான ஒரு இடமாகும். இது வரை இருந்த துயர நிலை எல்லாம் இனி மாறி நன்மையுண்டாகுமாம். 

இதனை சாதக சிந்தாமனி பின் வருமாறு கூறுகிறது.

"வீரிய ஸ்தானம் மீதில்
      விளங்கிடும் காரி யுற்றால்
காரியம் யாவும் வெல்லும் 
      காலமே ஏவல் செய்யுமாறே"

சிம்ம ராசிக் காரர்களுக்கு இவர் 7ம் வீட்டுக்கு உரியவராக இருந்தாலும் தற்போது இந்த ராசிக்காரர்கள் 7 1/2 ஆண்டுச் சனியிலிருந்து விடுபடுகின்றனர். இதனால் இல்லறம் நல்லறமாகும். தொழில்,கல்வி சிறக்கும். எனினும் புது தமிழ் வருடத்தின் முதல் ஆறு மாதங்கள் கவனமாய் இருந்து காரியமாற்றிட வேண்டும். பொதுவில் இந்த சனி பெயர்ச்சியால் அதிக நற் பலன்களைப் பெறும் ராசிகளில் இதுவும் ஒன்று.


கன்னி 

நட்சத்திரங்கள் - உத்திரம் 2ஆம், 3ஆம், 4ஆம் பாதம் , அஸ்தம், சித்திரை 1ஆம், 2ஆம் பாதம் வரை

இது வரை ராசிக்கு ஜென்ம சனியாக இருந்த சனி பகவான் இரண்டாம் வீடான துலாம் ராசிக்கு பெயர்கிறார். இந்த புதிய நிலை எழரை ஆண்டுச் சனியின் இறுதி காலகட்டம் ஆகும். கடந்த ஆண்டுகளில் நிலவி வந்த இறுக்கம், தயக்கம் போன்றவைகளின் தீவிரம் குறையும். 

இல்லறத்தில் கணவன் மனைவி உறவில் இருந்து வரும் பேதம் குறையும். உடல் நலத்தில் மேலதிக அக்கறை காட்டிட வேண்டி வரும். பொதுவில் இன்பம் துன்பம் என இரண்டும் கலந்த கால கட்டமாக இருக்கும். மிதமான பலன்களையே எதிர்பார்க்கலாம்.


துலாம் 

நட்சத்திரங்கள் - சித்திரை 3ஆம், 4ஆம் பாதம், சுவாதி, விசாகம் 1ஆம், 2ஆம், 3ஆம் பாதம் வரை

துலாம் ராசிக்காரர்கள் அனைவரும் கவரும் தோற்றமுடையவர்களாக இருப்பார்களாம். இத்தகைய துலாம் ராசிக்கு பன்னிரெண்டாவது வீடான கன்னி ராசியில் இருந்த சனி பகவான் பெயர்ந்து ஜென்மச் சனியாக ராசிக்கு வருகிறார். இதை ஏழரை ஆண்டுச் சனியின் உச்ச கால கட்டமாக சோதிட நூல்கள் கூறுகின்றன. இதனால் கடுமையான விளைவுகளை எதிர் நோக்க வேண்டி இருக்கும்.

எனினும் துலாம் ராசி நாதனான சுக்கிரன் சனி பகவானின் நட்புக் கிரகமாகிப் போனதனால் இந்த பாதிப்புகள் பாதியாக குறையுமாம். எதிரிகளை இனங்கண்டு ஒதுக்கி விட்டு, நல்லவர்களின் அருகாமையை கொள்வது இடர்களை குறைக்கும். பொதுவில் இந்த பெயர்ச்சியின் போது மத்திம பலன்களையே எதிர்பார்க்கலாமாம்.


விருச்சிகம் 

நட்சத்திரங்கள் - விசாகம் 4ஆம் பாதம், அனுஷம், கேட்டை.

விருச்சிக ராசிக்காரர்கள் விடா முயற்சியுடையவர்களாக இருப்பார்களாம். விருச்சிக ராசிக்கும் பதினோராம் இடமான கன்னி ராசியில் இருந்த சனி பகவான் பெயர்ந்து பன்னிரெண்டாவது ராசியான துலாம் க்கு வருகிறார். இது ஏழரை ஆண்டுச் சனியின் துவக்க கால கட்டமாகும். எனவே இதுவரை இருந்து வந்த அனுகூல நிலைகள் இல்லாது போகும். பொருள் விரயம் இந்த கால கட்டத்தில் உண்டாகும். எண்ணம், செயல், சொற்களின் கவனம் தேவைப் படும் கால கட்டமாகும். இடமாற்றத்தையும் அதிக செலவுகளோடு அலைச்சல்களையும் கொடுக்கும் கால கட்டமிது.

எனினும் சித்திரை முதல் ஆறு மாதங்களில் சுப பலன்கள் உண்டாகும். பொதுவில் இந்த கால கட்டத்தில் மத்திம பலன்களையே எதிர்பார்க்கலாம்.

நாளைய பதிவில் கடைசி நான்கு ராசிகளான தனுசு, மகரம், கும்பம், மீனம் ஆகிய ராசிகளின் பலன்களைப் பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனிப் பெயர்ச்சி பலன்கள் - மேஷம் முதல் கடகம் வரை..

Author: தோழி / Labels:


சனிபகவான் தற்போதைய இருப்பிடமான கன்னி ராசியில் இருந்து துலா ராசிக்கு எதிர்வரும் மார்கழி 04ம் திகதி அன்று 57 நாழிகை 26 வினாடி அதாவது 21.12.2011 காலை 05 மணி 20 நிமிடத்திற்கு பெயர்ச்சியாகின்றார். துலா ராசியானது சனிபகவானுக்கு உச்சஸ்தானம் என்று சொல்லப்படுகிறது இந்த நிலைக்கு வருவதன் மூலம் அவர் பலம் மிகுந்தவராகி விடுவார் என்கிறது சோதிட நூல்கள்.

இதன் எதிரொலியாக அடுத்த இரண்டரை ஆண்டுகளுக்கு ஒவ்வொரு இராசிக்கும் எத்தகைய பலன்கள் உண்டாகும் என்பதைப் பற்றி இனிவரும் பதிவுகளில் பார்ப்போம். இன்று முதல் நான்கு ராசிகளான மேஷம், ரிஷபம், மிதுனம் மற்றும் கடக ராசிகளுக்கான பலன்களைப் பார்ப்போம்.


மேஷம்

நட்சத்திரங்கள் - அசுவினி, பரணி, கிருத்திகை 1ஆம் பாதம் வரை.

மேஷ ராசிக்காரர்கள் அடிப்படையில் சுயநலம் குறைந்தவர்களாக இருப்பார்களாம். தற்போது இந்த ராசியில் இருந்து ஆறாவது கட்டமான கன்னி ராசியில் இருந்து பெயர்ந்து ஏழாவது கட்டமான துலாம் இராசிக்கு வருகிறார். இப்படி ஏழாவது கட்டத்திற்கு சனிபகவான் வருவதை கண்டச் சனி என்கிறது சோதிட நூல்கள். 

இதுவரை இருந்த ஆறாவது கட்டமானது அனுகூலமான பலன்களை தந்திருக்கும். இனி அவற்றில் சிறிய அளவிலான பாதிப்புகளை உண்டாக்கும் என்றால் மிகையில்லை. அடுத்த சித்திரை முதல் ஆறு மாதங்களில் சுப பலன்கள் வாய்க்கும். 

பொதுவில் இந்த பெயர்ச்சியினால் சனி பகவானின் பாதிப்புகள் குறைந்த அளவில் இருக்கும். அதே நேரத்தில் மிதமான நல்ல பலன்களை எதிர்பார்க்கலாம். பெரிய பாதிப்புகள் இல்லை என்பதே சுப பலன் என்பதை நினைவில் வைக்கவும்.


ரிஷபம்

நட்சத்திரங்கள் - கிருத்திகை 2ஆம், 3ஆம், 4ஆம் பாதம் , ரோகிணி, மிருகசிரீஷம் 1ஆம், 2ஆம் பாதம் வரை.

ரிஷப ராசிக்காரர்கள் அடிப்படையில் மிகுந்த முன் யோசனை உடையவர்களாக இருப்பார்களாம். தற்போது இந்த இராசியின் ஐந்தாவது கட்டமான கன்னி ராசியில் இருந்து சனிபகவான் பெயர்ந்து ஆறாவது கட்டமான துலாம் ராசிக்கு வருகிறார். இந்த நிலையை சாதக சிந்தாமணி பின்வருமாறு கூறுகிறது.

"காரி என்னும் ரவிமைந்தன்
        கனிவாய் ஆறாம் வீடுற்றால்
வாரிக் கொடுப்பார் மனதிலுன்
       வாட்டம்யாவும் தீரும் பாரே"

இந்த சனிப் பெயர்ச்சியினால் பெரிய அளவில் நன்மை பெறப் போவது இந்த ராசிக்கு உட்பட்டவர்கள்தான். உடல்நலம், மன நலம், செல்வ வளம் என எல்லா அம்சங்களிலும் ஏற்றம் உண்டாகுமாம். காரியத் தடைகள் விலகும், கல்வி சிறக்கும். குடும்பத்தில் மகிழ்ச்சி உண்டாகுமாம். குருவருளும், திருவருளும் கைகூடி நிற்கும் காலமாக இருக்குமாம். 


மிதுனம்

நட்சத்திரங்கள் - மிருகசிரீஷம் 3ஆம், 4ஆம் பாதம், திருவாதிரை, புனர்பூசம் 1ஆம், 2ஆம், 3ஆம் பாதம் வரை

மிதுன ராசிக்காரர்கள் பிறர் போற்றும் வகையில் முன் மாதிரியானவர்களாக இருப்பார்களாம். தற்போது இந்த ராசிக்கு நான்காவது கட்டமான கன்னி ராசியில் இருந்து சனி பகவான் பெயர்ந்து ஐந்தாவது கட்டமான துலாம் ராசிக்கு செல்ல இருக்கிறார். இதுவரை இருந்த நான்காவது கட்டத்தினை “அர்த்தாஷ்டம சனி” என்கிறது சோதிட நூல்கள். இத்தகைய இடத்தில் இருந்து பெயர்வது இந்த ராசிக்காரர்களுக்கு நல்ல செய்தியே!

இதனை சாதக சிந்தாமணி பின் வருமாறு கூறுகிறது.

"பஞ்சம ஸ்தானம் தன்னில் 
       பாங்காகக் காரி வந்தால்
மிஞ்சிய துன்ப மெலாம்
       மழிந்திடும் மேன்மை உண்டே"

சனி பகவானின் இந்த புதிய நிலையானது பூர்வ புண்ணிய பலன்களோடு தொடர்பு உடையது என்பதால், முற்பகலில் செய்ததன் பலன்களை இப்போது அறுவடை செய்ய வேண்டி இருக்கும். குடும்ப வழிச் சொத்துக்கள், உறவுகள் மூலமாக நெருக்கடிகள் உண்டாகலாம். குருவருளை வேண்டி வணங்கி இடர்களை களையலாம். 


கடகம்

நட்சத்திரங்கள் - புனர்பூசம் 4ஆம் பாதம், பூசம், ஆயில்யம்.

கடக ராசிக்காரர்கள் உயரிய சிந்தனைப் போக்கினை உடையவர்களாக இருப்பார்களாம். இத்தகைய கடக ராசிக்கு 3ம் இடமான கன்னி ராசியில் இருந்து 4ம் இடமான துலாம் ராசிக்கு சனி பகவான் பெயர்கிறார். இந்த நிலை அர்த்தாஷ்டம சனி எனப்படும். எனவே இதுவரை இருந்த அனுகூல நிலை இனி இருக்காது.

எனவே இந்த கால கட்டத்தில் கடக ராசிக்காரர்கள் எண்ணம்,சொல், செயல் ஆகியவற்றில் நிதானம் காட்டுவது நல்லது. எனினும் புது தமிழ் வருடத்தின் முதல் ஆறு மாதங்களில் சுபபலன்களை எதிர்பார்க்கலாம். மேலும் இந்த ராசிக்காரர்களின் தாயாருக்கும் தாய் மாமன்களுக்கும் பாதிப்புக்களைக் கொடுக்கும். தெய்வ வழிபாடு கைகொடுக்கும்.

அடுத்த நான்கு ராசிகளான சிம்மம், கன்னி, துலாம், விருச்சிகம் ஆகியவற்றின் பலன்களை நாளைய பதிவில் பார்ப்போம்.


சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனி என்ன செய்வார்?

Author: தோழி / Labels: ,

சித்தர்களின் சோதிட இயல் பெரும்பாலும் வாக்கிய பஞ்சாங்க கணித அடிப்படையில் அமைந்தது. ஒவ்வொருவரும் தங்களின் பெயர்களில் சோதிட நூல்களை அருளியிருப்பதால் நாம் பொதுவில் சித்தர்களின் சோதிட இயல் என்றே குறிப்பிடுவோம். நாம் இதுவரை சனி பகவானைப் பற்றியும் அவரது அம்சங்களை பற்றியும் பார்த்தோம்.

சனி பகவானின் குண இயல்புகளை பழந்தமிழ் நூலான “சாதக சிந்தாமணி” பின் வருமாறு விளக்குகிறது.

அலைசஞ் சலனபிங் கலக்கண்ணன்
ஆகம்மெலிந்து நீண்டு யர்ந்தோன்
மலைமா ருதனாம் பற்பெருத்தோன்
வாத ரோமன் சனியேயாம்
நிலையில் மந்தன் கதிர்மதிமால்
சுங்கன் பொன்சேய் நிரல்நிறையே
உலையில் நரம்பென் பிரத்தந்தோல்
உறுசுக் கிலமே நிணம்மச்சை

இரத்தஞ்சா மளங்கேழ் வெய்யோன்
தவளவெண் ணிறமே யிந்து
அரத்தமாந் தவளஞ் செவ்வாய்
அறுகுசா மளமே புந்தி
அரித்திரந் தவளஞ் செம்பொன்
அம்புகர் சாம வண்ணம்
வருத்தமில் கதிரோன் மைந்தன்
கறுப்பென வலியாற் கூறே.


அலைச்சலையும்,,சஞ்சலத்தையும் குணமாக கொண்ட சனி யானவர், மெலிந்த தேகத்தையுடையவனாகவும், நீண்ட சரீரத்தை கொண்டவனாகவும், வாத ரோகங்களையும் நரம்பு தொடர்பான நோய்களையும் ஆள்பவானாக இருப்பான் என்கிறது.

கீழே உள்ள படத்தில் நீங்கள் பார்ப்பது 12 ராசிகளின் அமைப்பை காட்டும் கட்டம். இதில் ஒவ்வொரு ராசியின் பெயரும் அதன் அதிபதியின் பெயரும் குறிப்பிடப் பட்டிருப்பதை காணலாம். இதில் பத்தாவது ராசியான மகரம் மற்றும் பதினோராவது ராசியான கும்பம் ஆகிய ராசிகளுக்கு சனி பகவான் அதிபதியாகிறார். சூரியனையும், சந்திரனையும் தவிர்த்து மற்ற கோள்கள் ஒவ்வொன்றும் இரண்டு ராசிக்கு அதிபதியாக இருப்பதையும் நீங்கள் அவதானிக்கலாம்.
சனி பகவான் ஒரு ராசியில் இரண்டரை ஆண்டு காலம் வாசம் செய்கிறார் என்று நேற்று பார்த்தோம். அவர் எந்த இராசியில் வாசம் புரிகிறாரோ அங்கிருந்து மற்ற ராசிகளை அவர் பார்க்கும் பார்வையினைப் பொறுத்தே பலன்கள் எழுதப் படுகிறது. இவை ஒரு கணித சூத்திரத்தின் கச்சிதத்தோடு சித்தர் பெருமக்களால் அருளப் பட்டிருக்கிறது. தற்போதைய நிலையில் சனிபகவான் கன்னி இராசியில் வாசம் செய்கிறார். இங்கிருந்து அடுத்த ராசியான துலாம் ராசிக்கு பெயர இருப்பதையே சனிப் பெயர்ச்சி என பரபரத்துக் கொண்டிருக்கிறோம். அப்படிப் பெயர்வதால் அடுத்த இரண்டரை ஆண்டு காலம் துலாம் ராசிக்கும் அங்கிருந்து அவர் பார்ப்பதனால் மற்ற ராசிகளுக்கும் உண்டாகப் போகும் பலன்களைச் சொல்வதே சனிப் பெயர்ச்சி பலன்கள் என்கிறோம்.

வாக்கிய பஞ்சாங்க கணிதத்தின் படி எதிர்வரும் மார்கழி 4ம் திகதி அன்று 57 நாழிகை 26 வினாடி அதாவது 21.12.2011 காலை 05 மணி 20 நிமிடத்திற்கு சனிபகவான் கன்னி ராசியிலிருந்து துலாராசிக்குப் பிரவேசிக்கின்றார். சோதிட நூல்களின் படி துலாம் ராசியானது சனி பகவானுக்கு உச்சஸ்தானம் என்று சொல்லப் படுகிறது. அதாவது துலாம் ராசிக்கு பெயர்ந்த பின்னர் அவர் மேலும் வலுவானவராகி விடுவாராம். அதனால்தான் இந்த பெயர்ச்சிக்கு இத்தனை பரபரப்பும், எதிர்பார்ப்பும் கூடுகிறது.

எல்லாம் சரிதான், சனிப் பெயர்ச்சி பலன்களை பார்ப்பதற்கு முன்னர் சனி பகவான் அருளும் நன்மை, தீமைகளை பற்றி தெரிந்து கொள்ள வேண்டாமா?. புலிப்பாணிச் சித்தரின் "புலிப்பாணி ஜோதிடம் 300" நூல் அதற்கும் பதில் தருகிறது.

கனமுள்ள நவமாறு லாபம் மூன்று
கதிர் மைந்தனதிலிருக்க விதியும் தீர்க்கம்
தனமுண்டு பிதுர் தோஷம் சத்துரு பங்கம்
தரணிதனில் பேர் விளங்கும் அரசன் லாபம்
குணமுள்ள கருமத்தி லிருக்க நல்லன்
கொற்றவனே வாகனமும் தொழிலு முள்ளோன்
பொனம் போல போகாதே சபையில் உறு
பூதலத்தில் யென்னூலைப் புகழுவாயே.

வலிமை யான இடங்களான 9,6,11,3 ஆகிய நிலைகளில் சூரிய பகவானின் மகனான சனிபகவான் நிற்பாரானால் குறிப்பிட்ட அந்த ஜாதகருக்கு ஆயுள் அதிகமாகுமாம், மேலும் பணவசதி படைத்தவராக இருப்பதுடன், பிதுர் தோஷமுள்ள அவன் சத்துருபங்கனாகவும் இருப்பானாம், உலகில் புகழ் பெற்றவனாக விளங்குவானாம். மேலும் அரசாங்கத்தின் மூலம் லாபங்களும் கிடைக்குமாம். சனி பகவான் ஜாதகனுக்குப் 10-ல் நின்றால் வாகன யோகமும் செய்கின்ற தொழில் செழிப்புற்று பொன்னும், பொருளும் கிடைக்குமாம். இவையெல்லாம் சனி பகவான் தரும் நற்பலன்கள்.

புகழ்கின்ற ஈராறு யிருநான் கேழில்
புனிதமுள்ள சனிரெண்டு நான்கில் நிற்க
இகழ்கின்ற வாத நோய் நாய் கடிக்கும்
இதமுள்ள அன்னைக்கு கண்டம் நான்கில்
நிகழ்கின்ற ரெண்டேழில் மனைவி நஷ்டம்
நிசம் சொன்னோம் யெட்டுக்கு உயிர்க்கு சேதம்
மகிழ்கின்ற ஈராறில் விரையமாகும்
துலையுமடா மாடாடு துன்பஞ் சொல்லே.


முக்கியத்துவம் வாய்ந்த 12,8,7,2,4 போன்ற இடங்களில் சனிபகவான் நிற்பாராக இருந்தால் ஜாதகருக்கு உண்டாகும் பலன்களாவது, ஜாதகருக்கு நான்காம் இடத்தில் சனி நிற்பாராயின் வாத நோயுண்டாகுமாம், நாய் கடிக்குமாம், பெற்றெடுத்த தாய்க்கு கண்டம் போன்றவைகள் உண்டாகுமாம். இதுபோன்று 2,7 ஆகிய இடங்களில் சனிபகவான் நிற்பாராக இருந்தால் மனைவி/ கணவருடன் சுமூகமான உறவு இருக்காதாம். இது போல் சனி பகவான் 8-ம் இடத்தில் நிற்பாராராக இருந்தால் ஜாதகருக்கு உயிர் ஆபத்து உண்டாகுமாம். இது போன்று 12-ம் இடத்தில் நிற்பாராகில் ஜாதகருக்கு பொருள் விரையமும், ஆடு, மாடுகள் இழப்பு உண்டாகுமாம் பொதுவாக துன்பங்களே உண்டாகும் என்கிறார்.

இதுவரை சனி பகவான் யார், அவரது இயல்புகள், குண நலன்கள், அவரால் உண்டாகும் நன்மை, தீமைகளைப் பற்றி பார்த்தோம். இனி வரும் பதிவுகளில் இந்த சனிப்பெயர்ச்சியினால் ஒவ்வொரு இராசிக்கும் என்ன பலன்கள் உண்டாகும் எனப்தைப் பற்றி பார்ப்போம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனி யார்?

Author: தோழி / Labels:




தந்தை : சூரியன்

தாய் : சாயா தேவி

உரிய பால் : அலிக் கிரகம்.

உரிய நிறம் : கருமை.

உரிய இனம் : சூத்திர இனம்.

உரிய வடிவம் : குள்ள உயரம்.

உரிய அவயம் : தொடை,பாதம், கணுக்கால்.

உரிய உலோகம் : இரும்பு.

உரிய மொழி : அன்னிய மொழிகள்.

உரிய ரத்தினம் : நீலம்.

உரிய ஆடை : கறுப்பு.

உரிய மலர் : கருங்குவளை.

உரிய தூபம் : கருங்காலி.

உரிய வாகனம் : காகம், எருமை.

உரிய சமித்து : வன்னி.

உரிய சுவை : கைப்பு.

உரிய தான்யம் : எள்.

உரிய பஞ்ச பூதம் : ஆகாயம்.

உரிய நாடி : வாத நாடி.

உரிய திக்கு : மேற்கு.

உரிய அதி தேவதை : யமன், சாஸ்தா.

உரிய தன்மை (சர - சத்திர - உபயம் ) : உபயக் கோள்.

உரிய குணம் : தாமசம்.

உரிய ஆசன வடிவம் : வில்.

உரிய தேசம் : செளராஷ்டிரம்.

நட்புப் பெற்ற கோள்கள் : புதன், சுக்கிரன், இராகு, கேது.

பகைப் பெற்ற கோள்கள் : சூரியன், சந்திரன், செவ்வாய்.

சமனான நிலை கொண்ட கோள்கள் : குரு.

ஒரு ராசியில் சஞ்சரிக்கும் கால அளவு : ஒவ்வொரு ராசியிலும் இரண்டரை வருடம்.

உரிய தெசா புத்திக் காலம் : பத்தொன்பது ஆண்டுகள்.

சனியின் மறைவு ஸ்தானம் : லக்கினத்துக்கு 8, 12ல் இருந்தால் மறைவு.

நட்பு வீடு : ரிஷபம், மிதுனம்.

பகை வீடு : கடகம், சிம்மம், விருச்சிகம்.

ஆட்சி பெற்ற இடம் : மகரம்,கும்பம்.

நீசம் பெற்ற இடம் : மேஷம்.

உச்சம் பெற்ற இடம் : துலாம்.

மூலதிரி கோணம் : கும்பம்.

உரிய உப கிரகம் : குளிகன்.

உரிய காரகத்துவம் : ஆயுள் காரகன்.

இது எனது மற்றொரு வலைமனையின் பதிவு.. அவசியம் கருதி இங்கே மீள் பதிவாக்கி இருக்கிறேன்.

தகவல்கள் நாளையும் தொடரும்....

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


சனி!

Author: தோழி / Labels: ,

எந்த ஒரு தினசரியாகட்டும், வாராந்திரி ஆகட்டும், மாதாந்திரி ஆகட்டும் புரட்டுகிற பக்கமெல்லாம் சனிப் பெயர்ச்சி பற்றிய விளம்பரங்களும், பலன்களும் என பரபரப்பாக காட்சி அளிக்கின்றன. ஒரு சில தசாப்தங்களுக்கு முன்னர் வரை இது பற்றி யாரும் பெரிதாக கவலைப் பட்டதோ, கருத்தில் கொண்டதோ இல்லை என்றும் தற்போதுதான் இது பற்றி இத்தனை பரபரப்பாக பேசப் படுவதாகவும் எனது தாயார் கூட அங்கலாய்த்துக் கொண்டிருந்தார்.

இந்த திடீர் விழிப்புணர்விற்கு அல்லது பரபரப்புக்கு ஊடக வளர்ச்சியும் அதன் பின்னே மறைந்து நிற்கும் வர்த்தக வாய்ப்புகளுமே காரணமாக இருக்கக் கூடும்.. ஒருவர் சொல்வதைப் போல மற்றொருவர் பலன் சொல்வதில்லை. ஒருவரோ ஒரு ராசிக்கு பயமுறுத்தும் பலன்களைச் சொல்கிறார், மற்றவரோ அதே ராசிக்கு கூரையை பிய்த்துக் கொண்டு அதிர்ஷ்டம் கொட்டப் போவதாக பலன் எழுதுகிறார். இவற்றில் எது உண்மை, எது பொய் என்ற குழப்பம் இந்த பலன்களின் நம்பகத் தன்மை மீது ஒருவித சந்தேகத்தினையும் உருவாக்கி விடுகிறது. வர்த்தக ரீதியாக இதை அணுகிடுவோர் ஒரு போதும் இதைப் பற்றியெல்லாம் கவலைப் படுவதேஇல்லை.

சோதிட இயல் பற்றி சித்தர் பெருமக்கள் பரந்து பட்ட அளவில் தகவல்களை அருளியிருக்கின்றனர். இவை புத்தகங்களாகவும் அச்சேறி இருக்கின்றன. நம்முடைய பதிவிலும் கூட சோதிடவியல் பற்றிய தகவல்களை முன்னரே தொடராக பகிர்ந்திருக்கிறேன். அவற்றை இந்த இணைப்பில் சென்று வாசிக்கலாம்.

இனி வரும் நாட்களில் சனி பகவான் குறித்தும், அவரின் இயல்புகள், நகர்வுகள், அதனால் உண்டாகும் பலன்கள், அதற்கான பரிகாரங்கள் பற்றி சித்தர் பெருமக்கள் அருளிய தகவல்களைப் பார்க்க இருக்கிறோம், சனியைப் போல் கொடுப்பாரும்மில்லை கெடுப்பாரும் இல்லை என்கிற பழமொழி சனி கோளின் மகத்துவத்தை உணர்த்தும். சனியின் பார்வைக்கு தப்பாதவர் என யாருமே இருக்க முடியாது என்றும் சொல்லப் பட்டிருக்கிறது.

சனியின் மகத்துவம் பற்றி பல்வேறு பழந்தமிழ் நூல்களில் குறிப்புகள் காணக் கிடைக்கின்றன. புலிப்பாணி சித்தர் சனியின் மகத்துவத்தினை பின்வருமாறு கூறுகிறார்.

தேனென்ற சனிதனக்கு மகரம் கும்பம்
தெகிட்டாத ஆட்சியது உச்ச கோலாம்
மானென்ற மேஷமது நீச்சம் மற்ற
மற்கடக சிம்மமொரு விருட்சிகந்தான்
ஊனென்ற வீண்பகையாம் மற்றோரைந்தும்
உள்ளபடி நட்பாகும் முடவனுக்கே
கொற்றவனே புலிப்பாணி கூறினேனே

சோதிட இயலில் சனியானவர் சூரியனின் மகனாக கூறப்படுகிறார்.சூரிய குடும்பத்தில் ஆறாவது கோளாக அறியப் படும் சனியானது,. சோதிட இயலில் ஏழாவது கோளாக குறிக்கப் படுகிறது. சோதிட நூல்களில் சனி பகவான் பல்வேறு பெயர்களால் அறியப் படுகிறார். அவையாவன...

அந்தன், கதிர்மகன், கரியவன், காரி, கீழ்மகன், சுந்தில், சவுரி, சாவகன், தமணியன், நீலன், நோய்முகன், பங்கு, மந்தன், முடவன், முதுமகன், மேற்கோள் என்பனவாகும்.

சனியின் குண இயல்புகள் மற்றும் அவரின் அம்சங்கள் பற்றி நாளைய பதிவில் பார்ப்போம்..

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


கூடு விட்டு கூடு பாய்தல்... நிறைவுப் பகுதி

Author: தோழி / Labels:

சித்தர் பெருமக்கள் பலரும் கூடு விட்டு கூடு பாய்ந்த தகவல்கள் நமக்கு பாடலாக கிடைத்திருக்கின்றன. தன்னுடைய உடலில் இருந்து உயிரைப் பிரித்து உயிரில்லாத மற்றொரு உடலுக்குள் நுழைந்து அதனை இயக்கத்திற்கு கொண்டு வருதலையே கூடு விட்டு கூடு பாய்தலாக அறிகிறோம். அந்த உடலில் சேர்ந்த பின்னர் தங்களின் பூர்வ கதைகள் அவர்களுக்கு நினைவில் இருந்ததும், தாங்கள் புகுந்த உடலுக்குறியவனின் கடமைகளையும் நிறைவேற்றியதையும் அறிய முடிகிறது.

கோரக்கர் தன் குகையின் அருகே மாடு மேய்த்துக் கொண்டிருந்த இடையன் நாகம் தீண்டி இறந்து போக, அவன் உடலைப் பார்த்து கதறிய மனைவியின் துயர் நீக்க தன் உடலை மறைத்து வைத்து இடையனின் உடலில் புகுந்து இடைச்சியின் துயர் நீக்கியதாக பின் வரும் பாடல் மூலம் அறிய முடிகிறது.

கண்டதோ ரிடையன் றன்னைக் கதித்ததோர் நாகந்தீண்டி
கொண்டதோ ரிடையன் சாகக் குறித்திடுந் தோழர்கண்டு
விண்டவன் மனையாளுக்கு வேகமாய்ச் சென்று சொல்லப்
பண்டுள்ள விதியோ நான்தான் பாவியோ யென்றுவந்தாள்

வந்தவள் துயர்கண்டு மறுகூடு பாய் வதற்கு
அந்தமா கிரிக்குச் சென்று ஆக்கையைப் பதனஞ் செய்து
நந்தனா மிடையன் கூட்டில் நயமுடன் பாய்ந்து பின்பு
முந்தியுள் ளிடையன் போல மங்கைமுன் வந்தார்.


ஒரு நாள் காட்டில் வேட்டைக்கு வந்த அரசனொருவன் கோரக்கரின் உடலைப் பார்த்து யாரோ இறந்தவர் உடலென எண்ணி தீயிட்டு எரித்து விட்டானாம். பிறகு கோரக்கர் தன் உடலை தேடி வந்த போது அது அழிந்தது கண்டு தனது சீடனான நாகார்ச்சுனனையும், சாணயாகியாரையும் தேடி, அவர்களை அழைத்துக் கொண்டு மூவருமாக ஒவ்வொரு வனமாக சித்தர்களை சந்திக்க சென்றார்களாம். சென்று ஒவ்வொரு வருடமாக ஒவ்வொரு சித்தருடனும் இருந்து குறைவில்லாது கற்பங்களை உண்டு இடையனின் உடலிலேயே வாழ்ந்திருந்தார் என அறிய முடிகிறது.

காசியில் சேனியர் குலத்தில் பிறந்த சட்டைநாதரும் ஞானம் பெற்று, கற்பங்கள் உண்டு பல்வேறு இடங்களைக் கடந்து சதுரகிரியை அடைந்தாராம். அங்கே இறந்து கிடந்த ஒரு பிராமணரின் உடலில் புகுந்து கற்பங்களை உண்டு அந்த உடலை மேம்படுத்தில் அப்படியே வாழ்ந்திருந்தார் என்பதை பின்வரும் பாடல் மூலம் அறிய முடிகிறது.

பெற்றுடன் வாழ்ந்தா ரந்தப் பேர்பெற்ற சட்டைநாதர்
உற்றசேணியர் குலத்தி லுதித்துநெய் தொழிற் படித்து
நற்றமிழ் தேர்ந்து இந்த நானில மெய்க்க ஞானங்
கற்றுமே கற்பங் கொண்டு காசினி தனைவிட் டேகி

விட்டுடன் மலையி லேறி வேதைக ளநேகஞ் செய்து
சட்டம தாக வேதான் சதுரமா கிரியில் வந்து
மட்டுடன் பிராமண தேக மதனிலே நுழைந் துகந்து
திட்டமாய் கற்பங் கொண்டு சிறப்புட னிருந்தார் பாரே.


இடையர் குலத்தில் பிறந்தவரான கொங்கணவர் கற்பங்கள் உண்டு இயல்பாய் வாழ்ந்திருந்த போது மலை மீதேறி அங்கிருந்த பளிங்கர்களுடன் உறவாடியிருந்தாராம். ஒரு சமயம் பளிங்கர் இனத் தலைவன் உயிரிழக்க அவர்களின் துயர் நீக்க தன்னுடல் விட்டு தலைவனின் உடலில் புகுந்து உயிர்ப்பிக்கச் செய்தாராம். மகிழ்ந்த பளிங்கர்கள் அவருடலை எரித்து விட்டனராம். பின்னர் பளிங்கர்களுடன் செடிகொடிகளை தேடி அறிந்து கற்பம் உண்டாக்கி உண்டு அந்த உடலிலேயே வாழ்ந்திருந்தாராம். இந்த தகவல்கள் பின் வரும் பாடல்கள் மூலம் நமக்குத் தெரிகிறது.

உள்ள கொங் கணரு மாதி யிடையனா யுலகந் தன்னில்
மெள்ளவே கற்ப முண்டு வியப்பதாய் மலையில் வந்து
வள்ளலா யிருந்து பேரை வாங்கியே பளிங்க ரோடு
கள்ளமில் லாமல் வாழ்ந்து காட்டினி லிருந்து வந்தார்.


வந்திடும் போதங் கேதான் மலைப்பளிங் கணுமே செத்து
விந்தையாய்ப் போகப் பார்த்து மிகவேதா னிரக்கங் கொண்டு
சந்தோஷ மாகத் தம்தன் சரீரத்தை வைத்து விட்டு
இந்தநல் சரீரந் தன்னி லியல்புடன் பாய்ந்து விட்டார்.

விட்டதைப் பளிங்கர் கண்டு மிகவேகொங் கணர்தேகத்தை
கட்டையில் வேகவைத்துக் களிப்புட னிருந்து விட்டார்
திட்டமாய்ப் பளிங்கரோடு சேர்ந்திலை செடிகள் கண்டு
சட்டமாய்த் தெரிந்து கற்பந் தானுண்டு மலையில் வாழ்ந்தார்

மலையிலே வாசஞ் செய்து வந்தன ரங்கங் கேதான்
தொலைதனி லிருக்கும் பூடு துறவுடன் தெரிந்து கொண்டு
வலையினி லகப்படாமல் மலையெலாஞ் சுத்திச் சுத்தி
இலைசெடி மரங்கள் தானும் இயல்புட னறிந்திருந்தார்.


இது போல இன்னும் பல சித்தர் பெருமக்கள் கூடுவிட்டு கூடு பாய்ந்த தகவல்கள் காணக் கிடைக்கின்றன. இந்த தகவல்களின் பின்னால் நிரம்பியிருப்பது சித்தர் பெருமக்களின் மனித நேயம் என்றால் மிகையில்லை. இந்த தகவல்களை எல்லாம் தேடித் திரட்டுவதே இப்போதைக்கு நாம் செய்யக் கூடியதாக இருக்கும். தகவல்கள் எல்லாம் ஒரு ஒழுங்கில் வைத்த பின்னரே அதன் மீதான எந்த ஒரு ஆய்வும், தீர்மானமும் செய்திட முடியும். அந்த வகையில் என்னளவில் இந்த தொடர் ஒரு ஆரம்பப் புள்ளியாக அமையும். எதிர் காலத்தில் குருவருள் அனுமதித்தால் மேலதிக தகவல் திரட்டி தெளிவுகளை பகிர்ந்து கொள்கிறேன்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


கூடு விட்டு கூடு பாய்தல் தொடர்ச்சி...

Author: தோழி / Labels: , ,

உடலை விட்டு வெளியேறி மீண்டும் அதே உடல் அல்லது வேறு உடலோடு இணையும் பரகாய பிரவேசக் கலையானது, ”கூடு விடா நிலை”, “கூடு விட்டு கூடு பாய்தல்” என இரண்டு படி நிலைகளை கொண்டது என்பதை நேற்று பார்த்தோம். முதல் நிலையில் தேறியவர்களுக்கு மட்டுமே இரண்டாவது நிலை சாத்தியமாகும்.

கூடு விடா நிலையில் உடலின் இயக்கம் யாவும் மட்டுப் பட்டு மிகமெலிதான சுவாசம் மட்டுமே இருக்குமாம். இத்தகைய நிலைக்கு உடலை பக்குவப் படுத்திட மிகக் கடுமையான பயிற்சிகள் அவசியமாகிறது. அவற்றை இரண்டு வகைகளாக கூறியிருக்கின்றனர். காய கற்பங்களை உண்பதன் மூலம் “காய சித்தி” நிலையை எட்டுவது. மற்றது யோகப் பயிற்சிகளின் மூலம் உயர் நிலையான யோக சித்தி அடைவது. இவ்விரண்டு பயிற்சிகளின் மூலமே கூடு விடா நிலையினை அடைய முடியுமாம். தற்போதைய நவீன அறிவியலோ இதன் சாத்தியங்களை முற்றாக நிராகரிக்கிறது.

ஆக, உடலை தகுதிப் படுத்துவதே இந்த கலையின் முதற்படி நிலை. ஏனெனில் உடலை விட்டு வெளியேறி மீண்டும் இணையும் வரை அந்த உடலானது அழியாமல் இருப்பது அவசியமாகிறது. இதன் பொருட்டே தங்களின் உடலை காடுகளிலும், மரபொந்துகளிலும், குகைகளிலும் மறைத்து வைத்ததாக தகவல்கள் காணக் கிடைக்கின்றன. இப்படி மறைத்து வைத்த உடல் ஒரு வேளை அழிந்து விட்டால் புதிதாக இணைந்த உடலுக்குத் தேவையான கற்பங்களை உண்டு அந்த உடம்பினை தகுதிப் படுத்திக் கொள்ள வேண்டுமாம். இந்தச் செய்தி கருவூரார் அருளிய கருவூரார் வாத காவியம் என்னும் நூலில் காணக் கிடைக்கிறது.

வழக்கத்தைச் சொல்லுகிறேன் நன்றாய்க் கேளு
வகையுள்ள சித்தநாதர்கள் மாறிமாறிப்
பழக்கமுள்ள கூடுவிட்டுக் கூடுபாய்வார்
பார்த்தவருங் காலமட்டு மிருந்து வாழ்வார்.
முழக்கமுடன் பின்புவந்து தன்சரீரம்
முழைந்து கொள்வார் தன்சரீரத் தப்பிப்போனால்
இளக்கமுள கற்பமதை சாப்பிட்டேன்தான்
இனிமையுடன் செடமலதைப் பெலஞ் செய்வாரே

பெலஞ் செய்வா ரதைவிட்டு மறுகூடேகிப்
பின்புமொரு கூடதனிற் பாய்ந்து வாழ்வார்
நலமுடனே அவர்கள் செய்யுந் தொழிலையேதான்
நானெடுத்துச் சொல்ல வென்றால் நாவோயில்லை.
பலமுடனே பரகாயஞ் செய்யும் பொழுது
பார்த்தாக்கால் வெகுசுருக்கு அதீதம் மெத்த
தலமுடனே தன்சரீர மொளித்து வைக்கத்
தான்செய்து வைத்துவைக்குங் குகையைப்பாரே.

மேலும் யோக சித்தி மற்றும் காயசித்தி அடைந்த நிலையில் உள்ள உடலை அழிப்பதும் கடினம் என்கிற செய்தியும் நமக்கு கிடைக்கிறது. திருமூலர் தன்னுடைய உடலில் இருந்து சமுத்திர ராஜன் உடலுக்கு கூடு விட்டு கூடு பாய்ந்து குடும்பம் நடத்தி வருகையில், மனைவியிடம் கொண்ட மோகத்தினால் தன் பூர்வ கதையையும், தன் உடல் இருக்கும் இடத்தையும் கூறிவிடுகிறார். மனைவி அந்த உடல் தன் இல்லற வாழ்க்கைக்கு ஆபத்து என கருதி அதை அழிக்கும் வகையினைக் கேட்க மனைவி மீதிருந்த அன்பினால் அந்த வகையினையும் சொல்கிறார். மனைவி தன் ஆட்களை அனுப்பி குகையில் இருந்த உடலைக் கண்டறிந்து திருமூலர் சொன்னபடி மருந்து பூட்டி எரித்த தகவல்கள் கருவூராரின் பின் வரும் பாடல்களின் மூலம் நமக்குத் தெரிய வருகிறது.

மற்றோருற் றோரும் மகிழ்ந்திருக்க இந்த
மாப்பிள்ளை பெண்ணும் பஞ்சணையில்
சற்றே படுத்துச்சந் தோஷமுற்றுப் பின்பு
தானிருந் தார்வெகு காலமட்டும்.

தாகம தாக யிருபேரு மொன்றாகச்
சந்தோஷ மாக யிருக்கையிலே
மோகத்தி னாலேமுன் வந்த சரிதையை
முற்றிலு மங்கே மொழிந்து விட்டார்.

என்றைக் கிருந்தாலும் மோசம் வருமென்று
எண்ணியே மாது இவரிடத்தில்
நன்றான வார்த்தைகள் பலது பேசியே
நன்மையுள்ள சன மெங்கேயென

கேட்ட வுடனே குகையிலிருப்ப தாய்க்
கெம்பீர மாகவுஞ் சொல்லி விட்டுத்
தேட்ட முடனதை யாருஞ் சுடாரென்றும்
தீயிடுஞ் சேதியுஞ் சொல்லி விட்டார்.

இந்த வகையெலாங் கண்டுகொண்டு அந்த
ஏந்திழை யாளும் புலையர்களை
விந்தை யுடனங்கு தானனுப் பிச்சடம்
விபரங் கூறியே வாக்களித்தாள்

மலையீனிற் சென்று குகையிற் பார்க்கையில்
மாது சொன்ன சடந்தானிருக்கப்
புலையர் கூடிச் சடத்தை மருந்துகள்
பூட்டியே மாட்டினார் தீயதனை

வெந்துநீ றாகியே போனபின்பு அதில்
மிக்க அஸ்திகளைத் தானெடுத்துச்
சந்தோஷ மாகவே ராஜாத்தி தன்னிடம்
தான் காட்டிப் போயினா ரேபுலையர்.

இப்படியாக இது முடிந்த தென
யாருக்குந் தோணாம லேயிருக்கச்
செப்பமுள்ள திரு மூல ராஜனும்
சிறப்பாய் வேட்டைக்குந் தானெழுந்து

வேட்டைக ளாடி முடித்தபின்பு மலை
மீதிலிருக்குங் குகையினிற் போய்
தாட்டிக மான சடத்தையுங் காணாமல்
தவித்து மயங்கியங் கேயிருந்து

வச்சிரந் தேகமதுஞ் சுட்டுக் கிடப்பதை
மனதாரக் கண்ணாலே தான்பார்த்து
உச்சித மாகத் தெரிந்து கொண்டு பின்பு
ஊரினி லேவந்து சேர்ந் திருந்தார்.

இந்தப் படியிவர் தானிருக்க இவர்க்
கினிமை யாகிய சீஷனுந்தான்
விந்தையுட னெங்குத் தான்தேடி இங்கு
விருப்ப மாகவே தேடிவர

சீஷன் வருவதைக் கண்டு திருமூலர்
செய்திகள் யாவு மவரிடத்தில்
நேசமுடன் சொல்லச் சீஷனுங் கண்டு
நெடுஞ்சாண் கடையாக வேதானும்.

பாதத்தில் வீழ்ந்து குருவென் றறிருந்துபின்
பத்தி யொடுசில வார்த்தை சொல்லி
நீத முடனேதான் தேடின சங்கதி
நேர்த்தியாய்ச் சொல்லி முடித்துவிட்டு

அன்றங்கு ராத்திரி தானிருந்து பின்
அருமையுள்ள மனை யாள் தனக்கும்
சென்றங்கு ஓர்சேதி சொல்லா மலிவர்
சேர்ந்தங் கிருவருந் தானேகி

காடு மலைகள் கடந்து குகைதனைக்
கண்டு யிருவரு மங்கிருந்து
தேடியே கற்பங்கள் சாப்பிட்டுப் பின்பவர்
தேகசித்தி செய்து கொண்டிருந்தார்.

ஆக கூடு விடா நிலை என்பது ஒரு வகையில் உடலினை உறுதி செய்து, உடல் இயக்கத்தை ஒரு ஒழுங்கில் கொண்டு அதன் இயக்கத்தை தேவைப் படும் போது நிறுத்தி வைக்கவும், செயல்படுத்தவுமான ஒரு கலை என்பது மட்டும் புரிகிறது. இந்த நிலையில் தேறினால் அழியாத உடலும் ஆரோக்கியமும் பெற்றிருக்க முடியும் என்பது தெளிவாகிறது. இது தொடர்பான மேலதிக ஆய்வுகள் நமக்கு உடற்கூறியல், மனித ஆயுட் காலம் பற்றிய பல புதிரான பக்கங்களை தெளிவு படுத்தும் வாய்ப்பு இருக்கிறது. எனவே ஆர்வமுள்ளவர்கள் இது தொடர்பாக முயற்சிக்கலாமே!

சித்தர் பெருமக்கள் கூடு விட்டு கூடு பாய்ந்த தகவல்களையும் அவற்றின் பின் புலத்தினையும் அடுத்த பதிவில் பகிர்ந்து கொள்கிறேன்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


கூடு விட்டு கூடு பாய்தல்!

Author: தோழி / Labels:

ஆய கலைகள் அறுபத்தி நான்கில் ஐம்பத்திஇரண்டாவது கலையாகவும், சித்தர் பெருமக்களின் அட்டமா சித்துக்களில் ஆறாவது சித்தாகவும் கூறப் பட்டிருப்பது "பரகாய பிரவேசம்" என்னும் கலை. இதனை எளிய தமிழில் கூடு விட்டு கூடு பாய்வது என்று நம்பில் பலரும் அறிந்திருப்போம்.

நேற்றைய பதிவில் உயிரானது உடலோடு எப்போது சேர்கிறது என்பதைப் பார்த்தோம். அப்படி சேர்ந்த உயிரானது நமது உடல் நலிவடைந்து செயலற்றுப் போகும் நிலையில் பிரிந்து விடுகிறது. இப்படி உயிர் உடலோடு சேர்வதும், சேர்ந்த உயிர் பிரிவதும் மனித சக்திக்கு அப்பாற்பட்ட ஒரு செயல். அப்படி இருக்கையில் நினைத்த மாத்திரத்தில் ஒருவர் தன் உடலை விட்டு நீங்கி பின்னர் அந்த உடலில் இணைவதோ அல்லது வேறொரு உடலில் இனைவதோ கற்பனைக்கும் எட்டாத ஒன்று. நிதர்சனத்தில் இது சாத்தியமே இல்லை என்கிறது நவீன அறிவியல்.

சாத்தியமே இல்லாத ஒன்றை நம் முன்னோர்கள் சாதித்திருக்கின்றனர். ஒருவரில்லை, இருவரில்லை பல்வேறு சித்தர் பெருமக்களின் பாடல்களின் ஊடே இந்த கலையினைப் பற்றிய குறிப்புகளும், தகவல்களும் விரவிக் கிடக்கின்றன. அதுபற்றிய சில விவரங்களை மட்டும் தொகுப்பதே இந்த தொடரின் நோக்கம்.

சித்தர் பெருமக்கள் நமது உடலை ஸ்தூல உடல், சூக்கும உடல் என இரண்டாக கூறியிருக்கின்றனர். தனித்துவமான பயிற்சிகளின் மூலம் இந்த இரண்டு உடல்களையும் ஒன்றிலிருந்து மற்றதைப் பிரித்து மீண்டும் இணைய வைத்திட முடியுமாம். இந்த பயிற்சி இரண்டு வகைப்படும் ஒன்று “கூடு விடா நிலை” மற்றது “கூடு விட்டு கூடு பாய்தல்”

கூடுவிட்டு கூடு பாய்தல் கேள்விப் பட்டிருப்போம். அதென்ன “கூடுவிடா நிலை”?

இந்த கூடு விடா நிலையை சித்தர் பெருமக்கள் இறந்தும், இறக்காமல் இருப்பது என்கின்றனர். அதாவது நமது உடலை நாமே இறந்தது போன்ற சலனமற்ற நிலைக்கு கொண்டுவந்து நீர், உணவு எதுவும் இன்றி சில நாட்கள் முதல் பல வருடங்கள் வரை வைத்திருப்பதையே கூடு விடா நிலை என்கின்றனர். பிரத்தியேக பயிற்சிகளின் மூலம் மட்டுமே இந்த நிலையினை அடைந்திட முடியும்.

இவை பற்றிய தகவல்கள் மிகவும் ரகசியமாக காக்கப் பட்டிருக்க வேண்டும். ஏனெனில் நான் தேடிய வரையில் இந்த நிலையினை எட்டும் பிரத்யேக பயிற்சிகள் பற்றிய தகவல்கள் இதுவரை எனக்குக் கிடைக்கவில்லை. குருவருள் அனுமதித்தால் எதிர்காலத்தில் கிடைக்கலாம்.

இந்த கூடு விடா நிலை இயற்கையாகவே சில உயிரினங்களுக்கு உண்டு. மீன்கள் (Mangrove killifish), தவளைகள் (burrowing frog) போன்ற சில உயிரிணங்களை உதாரணமாய் காட்டிடலாம்.. இவை சில/பல மாதங்கள் உணவு நீர் இன்றி கூடுவிடா நிலையான அசைவற்ற நிலையில் இருக்கும். பின்னர் உரிய காலம் வந்ததும் பழைய நிலைக்கு திரும்பி வாழ தொடங்கும். இந்த கூடுவிடா நிலையில் இந்த விலங்கினங்கள் இறந்தது போன்றே இருக்கும்.

ஆச்சர்யமான தகவல்தானே!

தகவல்கள் நாளையும் தொடரும்.


சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


உடலும் உயிரும்!

Author: தோழி / Labels: ,

உடலை விட்டு உயிர் பிரிந்து விட்டால் அந்த உடலுக்கு யாதொரு மதிப்பும் கிடையாது. ஒன்று உடலைச் சுட்டெரித்து விடுகிறோம் அல்லது புதைகுழிக்குப் போகிறது. ஆக உயிர் தங்கி இருக்கும் வரையில்தான் இந்த உடலுக்கு அவசியமும், தேவையும், மரியாதையும் இருக்கிறது.

இப்படிப் பட்ட இந்த உடலும், உயிரும் எப்போது எப்படித் தோன்றுகின்றன?

எது முதலில் உருவாகிறது?, உடலா?, உயிரா?

இந்தக் கேள்விகளுக்கு எல்லாம் அகத்தியர் தனது "அகத்தியர் ஆயுள் வேதம்” என்ற தனது நூலில் பதில் வைத்திருக்கிறார்.

சென்மமனிதர் தாமுஞ் சென்மிக்கும்வாறு கேளாய்
இன்னமுஞ் சுக்கிலத்தில் பிராணவாய்வதுவுஞ் சென்று
தின்னமாய் பிராணவாயுவு சென்றது கோபமுற்றி
யுன்னுமாமி ரத்தஞ்சூழ்ந்து வுதாரணவாய் வளர்க்கம்
சூழ்ந்து சுக்கிலதில் சுரோணிதங் கலக்குமென்று
பூந்திடும் வியாதி மூன்றும் பொருந்திடும் குமிழிபோல
ஏந்தியே திரளுமேழிலீரேழு தன்னிலூர்க்கு மாய்ந்த
நாளிருபத்தைந்தி லருங்முளை போற்றோன்றும்

- அகத்தியர்.

ஆணின் சுக்கிலத்தில் பிராணவாயு சென்றடைந்து கிளர்ச்சியுற்று உயிரணுக்கள் வளர்ச்சி அடையும். இந்த சமயத்தில் ஏற்படும் உறவினால், பெண்ணின் சுரோணியத்துடன் ஆணின் சுக்கிலம் கலந்து வாத, பித்த, கபம் என்று சொல்லப்படும் மூன்று விகற்பங்களும் அதனுடன் சேர்ந்து சிறு குமிழி போலாகி கருப்பையின் உட்சென்று தங்கி வளரத் துவங்கி, இருபத்தி ஐந்து நாளில் முளை போல தோன்றும் என்கிறார். இது உயிரற்ற ஒரு நிலை.

முந்திய திங்கள்தன்னில் கருமுளைத்தது கட்டியாகும்
பிந்திய திங்கள் தன்னிற் பிடரிதோள் முதுகுமன்றி
யுதிக்கும் மூன்றாந்திங்க ளுடல்விலா யரையுங்கால்கள்
ளுந்திக்கு யுயிரும்வந்தே யிணைந்திடுமென்றே.

- அகத்தியர்.

முதல் மாதத்தின் முடிவில் உருவான இந்த முளை பின்னர் வளர்ந்து ஒரு கட்டிபோல உருவாகுமாம். இரண்டாவது மாதத்தில் பிடறி, தோள், முதுகு ஆகிய பாகங்கள் உருவாகுமாம். மூன்றாவது மாதத்தில் உடல், விலா, இடுப்பு போன்றவைகள் உருவாகும்.அந்த கட்டதில் தான் கருவிற்கு உயிரும் வந்து இணையும் என்கிறார்.

ஆக,கருவானது மூன்றுமாத வளர்ச்சியின் பின்னரே உடலில் உயிர் வந்து சேருகிறது. அதன் பிறகே மற்ற அவயங்கள் வளரத்துவங்குகிறது.

இந்த தகவல்கள் எல்லாம் அறிவியல் வளராத பலநூறு வருடங்களுக்கு முன்னரே நமது முன்னோர்களால் தீர ஆராய்ந்து சொல்லப் பட்டிருக்கின்றன என்பதில்தான் இந்த தகவலின் மகத்துவமே அடங்கி இருக்கிறது. உடற்கூறியியலில் சித்தர் பெருமக்களின் ஆழ்ந்த அறிவு இன்றைய நவீன அறிவியலின் தெளிவுகளுக்கு கொஞ்சம் குறைந்ததில்லை என்பது நாம் பெருமிதத்துடன் நினைவு கூற வேண்டிய ஒன்று.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


பித்த வெடிப்பும், தீர்வும்!

Author: தோழி / Labels: , ,

பெண்களுக்கு பாதிப்பையும், கவலையையும் தருவது பாத வெடிப்பு எனப்படும் பித்தவெடிப்பு. இவை ஒரு வகையான பூஞ்சை காளான்களால் வருகிற பிரச்சினையாகும். தோல் இறுகி கடினமாகி வழவழப்பினை இழந்து வெடித்துப் பிளந்து பார்ப்பதற்கே அருவெறுப்பினை தரும். இந்த பிரச்சினை அநேகமாக பத்தில் ஐந்து பெண்களுக்காவது இருக்கிறது.

இவற்றிற்கு தற்போதைய நவீன மருத்துவம் நிறைய தீர்வுகளை அளித்தாலும், அவை செலவு பிடிப்பதாகவும், முழுமையான தீர்வினை தருவதாகவும் இல்லை என்பதுதான் உண்மை. இந்த பிரச்சினைக்கு தேரையர் எளிமையான இரண்டு தீர்வினை நல்கியிருக்கிறார். அதனையே இன்றைய பதிவில் பார்க்கப் போகிறோம்.

தனது தேரையர் வாகடம் என்னும் நூலில் தேரையர் இந்த முறைகளை அருளியிருக்கிறார்.

"உப்பு மண்புழுங் கரிசியூ மத்தவித் திந்துப்புத் தயிரொ
டெருக்கம்பால் ஒக்க விரைப்பன விற்பா தப்பிளப் படங்கப்பூச
நிலைவிற் றாமரை யாங்காலே யறுத்துப் போடும் வேரோடே."

“உப்பு மண்”, “புழுங்கலரிசி”, “ஊமத்தை விதை”, “இந்துப்பு” இவை நான்கினையும் சம அளவில் எடுத்து, தயிர் விட்டு அரைத்து எடுத்துக் கொள்ள வேண்டுமாம். பின்னர் இந்தக் கலவையில் எருக்கம் பால் விட்டரைத்துக் கால்களில் அப்பி வைத்தால் கால் வெடிப்புகள் அடியோடு நீங்கி விடும் என்கிறார். மேலும் பாதம் தாமரைப் பூப்போல் ஆகுமாம்.

இதே பிரச்சினைக்கு மற்றொரு தீர்வாக பின் வரும் பாடலையும் தந்திருக்கிறார் தேரையர்.

"காத்துக் கஞ்சிநீர்காலசா தத்தினடுக்
கொண் ணெறித்தி ரிக்குதென
நீற்றுப் பாலநெய்யில்காலிட வல்லீரெல்
சேத்துத் தாமரை செய்யிதழொக்குமே."

சூடான வடிகஞ்சியில் காலை வைத்தும், சூடான அன்னத்தைச் சுடுகஞ்சி விட்டு அரைத்துக் அத்துடன் கற் சுண்ணமும் கலந்து சூடாகக் கால்வெடிப்பின் மேல் பூசி வந்தாலும் பாத வெடிப்பு நீங்கி, பாதம் தாமரை இதழைப் போல ஆகுமென்கிறார்.

எளிய முறைதானே!

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


அஷ்ட கணபதியும், திரு நீற்று செபமும்!

Author: தோழி / Labels: ,

அகத்தியர் தனது “அகத்திய வாத சௌமியம்” என்னும் நூலில் அஷ்ட கணபதி பற்றியும், அந்த கணபதியை வணங்கும் மூல மந்திரம் பற்றியும், அந்த மூல மந்திரத்தை பயன் படுத்தி பல்வேறு நோய்களை தீர்க்கும் முறையினையும் அருளியிருக்கிறார்.

ஆமப்பா அஷ்டதிசைக் கரசாய்நின்ற
அருமையுள்ள புலத்தியனே சொல்லக்கேளு
ஓமப்பா ஆதிகண பதிதானொன்று
உறுதியுள்ள மகாகண பதிதானொன்று
தாமப்பா நடனகண பதிதானொன்று
சங்கையுள்ள சக்திகண பதிதானொன்று
நாமப்பா சொல்லுகிறோம் ஒன்றாய்க்கேளு
நன்மையுள்ள வாலகண பதிதானொன்றே.

ஒன்றான உச்சிட்ட கணபதிதானொன்று
உத்தமமே உக்கிரகண பதிதானொன்று
நன்றான மூலகண பதிதானொன்று
நாட்டமுட அஷ்டகண பதிக்குமொன்றாய்க்
குன்றாத மூலமந்திர சூக்ஷந்தன்னைக்
குறிப்புடனே சொல்லுகிறேன் குணமாய்க்கேளு
நின்றாடு மூலமடா ஆதிமூலம்
நிலையறிந்து ஓம்கிலி அங்உங்கெண்ணே

ஆதி கணபதி, மகா கணபதி, நடன கணபதி, சக்தி கணபதி, பால கணபதி, உச்சிட்ட கணபதி, உக்கிர கணபதி, மூல கணபதி என எட்டு வகை கணபதி இருப்பதாக கூறுகிறார்.

இந்த எட்டு வகை கணபதிக்கும் ஒரே முலமந்திரம் இருக்கிறது. அது “ஓம் கிலி அங் உங்” என்பதாகும். இந்த மூல மந்திரத்தை எவ்வாறு பயன் படுத்தி பலனடைய வேண்டும் என்பதை பின் வருமாறு விளக்குகிறார்.

எண்ணமுடன் இடதுகையால் விபூதிவைத்து
ஏகாந்த கணபதியின் சுழியைநாட்டி
சொன்னமொழி தவறாமற் சுழியைப்பார்த்து
சுத்தமுடன் ஓம்கிலி அங்உங்கென்று
தன்னகமே சாட்சியாய் இருநூற்றெட்டுத்
தான்செபித்து விபூதியைநீ கடாட்சித்தாக்கால்
முன்னிறைந்த சற்குருவின் கடாக்ஷத்தாலே
மூர்க்கமுடன் தீருகிற வியாதிகேளே.

கேளப்பா சுரமுடனே சன்னிதீரும்
கெடியான குன்மமுடன் காசந்தீரும்
சூளப்பா வஞ்சினையும் ஏவல்தீரும்
சுருக்கான பலவிஷமுந் தோஷந்தீரும்
வாளப்பா கரப்பனொடு கெர்ப்பரோகம்
வயற்றிலுள்ள திரட்சியெல்லாம் வாங்கிப்போகும்
ஆளப்பா அஷ்டதிசைக் கரசாய்நின்று
ஆதியென்ற பூரணத்தில் அழுந்தலாமே.

இடதுகையில் சிறிதளவு வீபூதியை எடுத்துக் கொண்டு அதில் கணபதியின் சுழியான “உ” என்பதை எழுதிக் கொள்ள வேண்டும். பின்னர் அந்த திரு நீற்றைப் பார்த்து கணபதியின் மூல மந்திரத்தை இருநூற்றி எட்டு தடவைகள் செபிக்க வேண்டும் என்கிறார்.

இப்படி செபிக்கப் பட்ட விபூதியை அணிவதால் சுரமுடன் ஜன்னியும் தீருமாம், குன்மமுடன் காசமும் தீருமாம் வஞ்சனை, ஏவல்கள் தீருமாம். அத்துடன் பலவித தோஷங்கள் நீங்குமாம். இது தவிர கரப்பான், கெர்ப நோய்கள் வயிற்றில் இருக்கும் திரட்சிகள் எல்லாம் தீரும் என்கிறார் அகத்தியர்.

ஆச்சர்யமான தகவல்தானே!

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


பற்களை பாதுகாக்க ஓர் பற்பொடி!

Author: தோழி / Labels: ,

“பல்லுப் போனால் சொல்லுப் போச்சு” என்கிற பழமொழி உணர்த்தும் சொல் என்பது உடல் ஆரோக்கியத்தை என்றே கருத வேண்டும். ஏனெனில் பற்களின் ஆரோக்கியமே உடலின் ஆரோக்கியத்தின் அடையாளம். சமீப காலத்தில் பல் மருத்துவம் மிக பெரிய அளவில் வளர்ந்து கொண்டிருக்கும் வைத்திய துறை என்றால் மிகையில்லை.

இன்றைக்கு நவீன அறிவியல் பற்களை பராமரிக்கவும், பளிச்சென வைக்கவும் பல்வேறு மருந்து பொருள்களை சந்தைப் படுத்தினாலும் கூட, நமது முன்னோர்கள் நமக்களித்த ஆலும், வேலும் இன்றும் சிறப்பான பல் பராமரிப்பு உத்தியாக இருக்கிறது என்றால் மிகையில்லை. பற்களை பராமரிப்பது மற்றும் அவற்றில் பழுது உண்டாகி விடுவதை தடுப்பது போன்ற விழிப்புணர்வு நமது முன்னோர்களுக்கு இருந்திருக்கிறது.

அந்த வகையில் செயற்கை பொருட்களைத் தவிர்த்து இயற்கை பொருட்களைக் கொண்டு பற்களை உறுதியாகவும் குறை இன்றியும் பேண ஒருவகையான பற்பொடி ஒன்றை தயாரிக்கும் முறையைதன்வந்திரி தனது “தன்வந்திரி வைத்திய காவியம்” என்னும் நூலில் அருளியிருக்கிறார்.

போச்சப்பா தந்தமென்ற வியாதிக்கப்பா
பொல்லாத அரப்பொடியு மக்கிராகாரம்
நீச்சென்ற படிகாரம் மிருதார் சிங்கு
நோரான லவங்கையிடப் பட்டையப்பா
ஆச்சென்ற காசுக்கட்டி துருசுங்கூட்டி
அப்பனே கணக்காகக் கல்வம் போடு
பாச்சென்ற எலுமிச்சம் பழச்சாற்றாலே
பாங்குபெற நாற்சாம மாட்டு ஆட்டே.

ஆட்டியே நெருங்கவே மடிந்தபின்பு
அப்பனே சீசாவிற் பதனம் பண்ணு
கூட்டியே நான்குநாள் தேய்த்து வந்தால்
குடிலமாம் தந்தஅசைவு தந்தசன்னி்
நீட்டியே சீழ்விழல் ரத்தங்காணல்
நிலையாது வுடலை விட்டு நீங்கும்பாரு
தாட்டிகமா யிந்தநூல் முறைபொய்யாது
தப்பாது தப்பாது திண்ணந்தானே.


அரப்பொடி, அக்ராகாரம், படிகாரம், மிருதார் சிங்கி, லவங்கப்பட்டை, காசுக்கட்டி, துருசு இவைகளை சம எடையில் எடுத்து கல்வத்தில் போட்டு எலுமிச்சம் பழச்சாறு விட்டு நான்கு சாமம் அரைக்க வேண்டுமாம். ஒரு சாமம் என்பது மூன்று மணி நேரம்.

இவ்வாறு நான்கு சாமமாக நன்கு அரைத்து பின்னர் அதை சேகரித்து பத்திரப் படுத்திக் கொள்ள வேண்டுமாம். பின்னர் இந்த கலவையை கொண்டு நான்கு நாட்கள் பல் துலக்கிவர தந்தவாய்வு, தந்தசன்னி, தந்தத்தில் சீழ்வடிதல், ரத்தம் வடிதல், முரசு சம்பந்தமான நோய்கள் எல்லாம் தீரும் என்கிறார். இப்படிச் செய்தால் இந்த நோய்கள் நிச்சயம் குணாமாகும் என்பதையும் வலியுறுத்துகிறார்.

இந்த சரக்குகள் எல்லாமே தற்போது எல்லா நாட்டு மருந்து கடைகளில் கிடைக்கிறது. விலையும் மிக மலிவுதான். இயற்கையான இந்த பற்பொடியினை நாம் வீட்டிலேயே தயாரித்து பலன் பெற்றிடலாம்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


மிளகு கற்பம்.

Author: தோழி / Labels: , , ,

கற்ப வகைகளைப் பற்றி ஏற்கனவே பல பதிவுகளில் பகிர்ந்திருக்கிறேன். எளிய கற்ப வகைகள் ஏதுமிருந்தால் பகிர்ந்திட பலரும் வேண்டியிருந்தனர். தேரையர் அருளிய “தேரையர் காப்பியம்” என்னும் நூலில் காணக் கிடைத்த எளிய கற்பமான “மிளகு கற்பம்” பற்றி இன்றைய பதிவில் பார்ப்போம்.

மரிசமொவ் வொன்றொரு வார மட்ட திக
வரிசையாய்த் தினமுமோர் மண்டலங் காலமே
யுண்டிடு தேசுட னுரமிகு பசியுங்
கொண்டிடு மதன்பொடி குழைத்து நெய்யுடனே
யுண்டிடத் தொனிதரு மோதுமிப் பொருளொடக்
காரமுங் குழைத்துணக் கடும்பசி யழலுறும்
பாரிய நோய்களும் பறக்கும தொன்றையுங்
குடிநீ ரட்டுணக் குலவுமுத் தோடமுங்
கொடும்பிணி யாவும் குடிகெட் டோடுமே

- தேரையர்.

இந்த வகை கற்ப முறைக்கு தரமான நூற்றித் தொண்ணூற்றி இரண்டு(192) மிளகுகள் தேவை படும். முதல் நாள் ஒரு மிளகு, அடுத்த நாள் இரண்டு, அதற்கடுத்த நாள் மூன்று என ஒவ்வொரு எண்ணிக்கையாக ஏழு நாள் வரை வெறும் வாயிலிட்டு நன்கு மென்று விழுங்கிட வேண்டுமாம்.

பின்னர் எட்டாம் நாளில் இருந்து ஆறு மிளகு, ஒன்பதாம் நாள் ஐந்து மிளகு என குறைத்துக் கொண்டே பதின் மூன்றாம் நாள் ஒரு மிளகு ஆகும் வரை சாப்பிட வேண்டுமென்கிறார். பதின்நான்காம் நாள் மீண்டும் எண்ணிக்கையை உயர்த்தி இரண்டு மிளகு என தொடர வேண்டும். இப்படி தொடர்ந்து ஏழு ஏழு நாட்களாய் கூட்டிக் குறைத்து ஒரு மண்டலம் அதாவது நாற்பத்தி எட்டு நாட்கள் மிளகை சாப்பிட்டு வர வேண்டுமாம்.

இப்படி ஒரு மண்டல காலம் சாப்பிட்டு வந்தால் உடல் ஒளி பெறுவதுடன்,வலிமையும் அடையுமாம். மேலும் முக்கியமாய் ஆயுளும் அதிகரிக்கும் என்கிறார் தேரையர்.

எல்லாம் சரிதான், எப்படி உண்ண வேண்டும்?, இதில்தான் இந்த கற்பத்தின் சூட்சுமம் அடங்கியிருக்கிறது.

காலை அல்லது மாலை வேளைகளில் இந்த மிளகை உண்ணலாம் என்கிறார்.ஆனால் இதை சாப்பிடுவதற்கு ஒரு சாமம் அதாவது மூன்று மணி நேரத்துக்கு முன்னால் வரை உணவு உட்கொள்ளக் கூடாது என்கிறார். மேலும் பத்தியமாக “மது, மாது, மாமிசம்” விலக்கிட கூறுகிறார்.
எளிய கற்ப முறைதானே!

மேலும் மிளகை பொடியாக்கி தேனுடன் குழைத்து உட்கொண்டு வந்தால் குரல் இனிமையடையுமாம்.

சிட்டிகையளவு மிளகுப் பொடியுடன் தேவையான அளவு நாட்டுச் சர்க்கரை சேர்த்து உட்கொண்டால் கடும்பசி ஏற்படுவதுடன் பித்தம் சார்பான நோய்களும் நீங்குமாம்.

மிளகைக் குடிநீராகக் காய்ச்சி பருகி வந்தால் முக்குற்றங்களாகிய வளி, அழல், ஐய நோய்களையும் மற்றும் பல கொடும் பிணிகளையும் தீர்க்குமாம் என்கிறார் தேரையர்.

குடி நீர் என்பது எட்டுப் பங்கு நீர் விட்டு ஒரு பங்காக காய்ச்சி எடுப்பதாகும்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


ரவிமேகலை என்னும் பொக்கிஷம்!

Author: தோழி / Labels: ,

காலத்தே அழிந்து கொண்டிருக்கும் சித்தர் பெருமக்களின் நூல்களை மின் நூலாக தொகுத்து இணையத்தில் பகிர்ந்து கொள்ளும் தொடர் முயற்சியில் எனது பதின்மூன்றாவது படைப்பாக கோரக்கர் அருளிய "ரவிமேகலை - 75" என்கிற இந்த நூலை மின் நூலாக்கி இருக்கிறேன்.

பதினென் சித்தர் மரபில் பதினாறாவது சித்தராக வைத்து போற்றப் படுபவர் கோரக்கர். பல்வேறு சித்தர் பெருமக்களும் இவரின் சிறப்புகளை தங்களின் பாடல்களில் குறிப்பிட்டிருப்பது இவரது மகத்துவத்தை நமக்கு உணர்த்துகிறது. இவை தாண்டி இவர் மகத்துவம் கூறும் பல்வேறு செவிவழிக் கதைகள் புழக்கத்தில் உண்டு.

கோரக்கர் பாடல்களில் எளிமையான சொல்நயமும், சந்த வகுப்பும் சிறப்பாக அமைந்திருப்பது அவரது மொழியாளுமையை பறைசாற்றுகிறது. இதுவரை நம்மில் பலரும் அறிந்திராத பல சூட்சுமங்களையும் அவற்றின் ஊடே பொதிந்திருக்கும் அரிய பல தகவல்களைக் கொண்ட இந்தநூல் நமக்குக் கிடைத்த பெரும் பொக்கிஷம் என்றால் மிகையில்லை.

காலமதில் கடியரவின் விடமும் ஏறா
கடுந்தீயின் சூடேறா சலமுங் கொல்லா
ஞாலமதில் சமாதிபெற மண்ணுந் தின்னா
நடுவனவ னுனதருகே வரவே மாட்டான்
வேலனைய கத்திவாள் வெட்டு மேறா
விடந்தலைமேற் கொண்டவனும் விமலி யாத்தாள்
சீலமுடன் ஞானப்பால் தந்து கந்தே
யீரெட்டாம் வயதுமெப்போ திருந்து வாழ்வாய்.

இந்த மின் நூலினை பார்வையிடும் நண்பர்கள் அறிந்தவர், தெரிந்தவர் என்கிற பாகுபாடு இல்லாமல் ஆர்வம் உள்ள அனைவருடனும் பகிர்ந்து கொள்ள வேண்டுகிறேன்.

எனது மேலான குருவினை பணிந்து இந்த முயற்சியினை உங்கள் பார்வைக்கு வைக்கிறேன்.

மின்நூலை இந்த இணைப்பில் தரவிரக்கிக் கொள்ளலாம்.


சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


மரணத்தை வெல்ல....

Author: தோழி / Labels: ,

இந்த உலகில் மனிதனால் வெல்ல முடியாதது என ஒன்று இருக்கிறதென்றால், அது மரணமாகத்தான் இருக்கும். இத்தனை ஆண்டு கால மருத்துவ ஆராய்ச்சிகளின் முடிவில் நம்மால் மரணத்தை கொஞ்சம் தள்ளிப் போட முடியுமே தவிர வெல்ல முடியாது.

இப்படி வெல்லவே முடியாத மரணத்தையும் வெல்ல முடியும் என்கிறார் அகத்தியர். அவரது ”அகத்தியர் பூரணசூஸ்திரம் 216” என்னும் நூலில் இதற்கான விவரம் காணப் படுகிறது. இதன் நம்பகத்தன்மை மற்றும் சாத்திய அசாத்தியங்கள் விவாதத்திற்கும், மேலதிக ஆய்வுக்கும் உட்பட்டது. எனவே இதனை ஒரு தகவல் பகிர்வாக மட்டுமே கருதிட வேண்டுகிறேன்.

விளையுமடா கிழக்காகக் காதம் மூன்றில்
வெகுவிதமாம் பொன்னிமிளை விளையும் பூமி
தளையுமடா பொதிகைமலைச் சார்பு தன்னில்
தாம்பிரவே ணிக்கரையில் அருவி ஆற்றில்
முளையுமடா அதனடுத்த தெற்கே காத
மூவிலையால் குருத்துந்தான் மரமுண்டாகும்
தளையுமடா அதிநடுவே சோதி விருட்சம்
தன்னோடு வெண்சாரை தானும் உண்டே.

தன்னையே கண்டவுடன் ரம்பிதேதேதான்
சார்வான நடுமையம் பிடித்தாய் ஆனால்
பின்னையே பிடித்தவிடங்க் கையிருக்கப்
பேராக விருதுண்டாய்ப் பொருந்திப் போகும்
மின்னையே கையில் இருக்கும் அதனைத் தின்றால்
இருபதினா யிரவருடம் இருத்தும் பாரு
பொன்னையே தேடாதே கற்பந் தேடு
பொருள்காணப் புருவ மையம் நோக்கிப் பூணே.

பொதிகமலைச் சாரலில் பொன்னிமிளை விளையும் பிரதேசம் ஒன்று இருக்கிறதாம். அதை அண்டிய பகுதியில் தாம்பிரவேணி என்னும் ஆறு ஓடுகிறதாம். அதற்க்கு தெற்குப் பக்கமாக காத தூரம் சென்றால் மூவிலையை குருத்துக்களாகக் கொண்ட மரங்கள் இருக்குமாம். அவற்றின் நடுவே சோதிவிருட்சமும் இருக்கிறதாம். அதில் வெண் சாரைப் பாம்பு இருக்குமாம்.

இந்த பாம்பை கண்டவுடன் அதன் உடலில் நடு மையத்தை கையால் பிடிக்க வேண்டுமாம். அப்படி பிடித்தால் பிடிக்கிற பகுதி கையோடு வந்துவிடுமாம். இப்படி பிடிக்கும் போது வெண் சாரை கடிக்காதாம். உடனே பாம்பின் மற்ற இரண்டு பகுதிகளும் ஒன்றோடு ஒன்று ஒட்டிக் கொள்ளுமாம். ஒட்டியவுடன் பாம்பு ஓடிவிடும் என்கிறார்..

இப்போது கையில் இருக்கும் வெண் சாரைப் பாம்பின் பகுதியை சாப்பிட வேண்டும் என்கிறார் அகத்தியர். அப்படி சாப்பிட்டவர்களுக்கு இருபதாயிரம் வருடம் உடல் அழியாது இருக்குமாம். இந்த காலத்தில் பொன் பொருள் மீது மோகம் கொள்ளாமல் கற்ப வகைகளை தேடி அறிவதுடன், புருவ மத்தியை நோக்கி தியானித்திருக்க வேண்டும் என்கிறார்.

ஆச்சர்யமான தகவல்தானே!

அடுத்த பதிவில் கோரக்கர் அருளிய “ரவிமேகலை 75” யை மின்நூலாக பகிர்ந்து கொள்கிறேன்.


சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


குழந்தைப் பேறில்லாதவர்களுக்கு....

Author: தோழி / Labels:

குழந்தை பேறில்லாமல் துயரத்தில் அழுந்தும் தம்பதியரின் குறை தீர்க்கும் எளிய வழி ஒன்றினை அகத்தியர் தனது “அகத்தியர் பரிபூரணம்” என்னும் நூலில் அருளியிருக்கிறார். பலரின் தொடர்ச்சியான வேண்டுகோளை நிறைவு செய்திடும் வகையில் இன்று அந்த முறையினை இங்கே பகிர்ந்து கொள்கிறேன்.

இருந்துகொண்டு குருபரனைத் தியானம்பண்ணி
இன்பமுடன் ஓம்றீங் அங்வங்கென்று
வருந்திமனக் கனிவதனால் தேனில்மைந்தா
மார்க்கமுடன் ஆயிரத்தெட்டு உருவேசெய்து
அருந்தவமாய் தலைமுழுகும் போதில்மைந்தா
அன்புடனே பெண்களுக்கு யீய்ந்தாயானால்
திருந்தியந்த மங்கையர்க்குக் கெற்பமுண்டாம்
திட்டமுடன் கண்மணியைக் காண்பார்பாரே.

பாரப்பா மலடாகி இருந்தாலென்ன
பக்குவமாய் யன்பதுக்குள் கெர்ப்பமுண்டாம்
நேரப்பா மணிமந்திர மிதுதானாகும்
நேர்மையுள்ள ரகசியமது சந்தானவித்தை
ஆரப்பா அறிவார்கள் சந்தானகரணி
அறிந்துமன துரிமையனா லடக்கம்பண்ணி
சாரப்பா சாகரத்தில் தவசுபண்ணி
சதாகாலம் பூரணத்தில் சார்ந்துவாழே.

- அகத்தியர்.

வெள்ளியினால் ஆன ஒரு கிண்ணத்தில், ஒரு கழஞ்சு தேன் விட்டு அதனை வலது கையில் ஏந்திக் கொள்ள வேண்டுமாம். பின்னர் கிழக்கு முகமாய் அமர்ந்து/இருந்து கிண்ணத்தில் இருக்கும் தேனை கவனக் குவிப்புடன் பார்த்துக் கொண்டே “ஓம் றீங் அங் வங்” என ஆயிரத்து எட்டு தடவைகள் தொடர்ச்சியாக செபிக்க வேண்டுமாம். இந்த செயல்முறையை குழந்தை பேறு வேண்டும் தம்பதியரில் கணவனே செய்திட வேண்டும் என்கிறார்.

இவ்வாறு செபித்த தேனை மனைவியியானவள் மாத விலக்கு முடிந்து தலை முழுகிய பின்னர், உண்ண்க் கொடுத்து இல்லறத்தில் ஈடுபட்டு வர கருத்தரிக்கும் என்கிறார் அகத்தியர். இந்த முறைக்கு எவ்விதமான பத்தியமும் கூறப் படவில்லை. மலடு என சொல்லப் பட்டவர்களுக்கும் இந்த முறையினால் கருத் தரிக்கும் என்கிறார் அகத்தியர்.

ஆச்சர்யமான தகவல்தானே!, தேவையிருப்பவர்கள் குருவினை வணங்கி முயற்சிக்கலாம். தேவையுள்ளோருக்கு இந்த தகவலை அறியத் தரலாம்.

அடுத்த பதிவில் வேறொரு தகவலுடன் சந்திக்கிறேன்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...


நோக்கு வர்ம செயல்பாடு!

Author: தோழி / Labels: ,


நமது உடலானது எழுபத்தி இரண்டாயிரம் நாடிகளால் பின்னப் பட்டிருப்பதாக சித்தரியல் கூறுகிறது. இது குறித்து ஏற்கனவே முந்தைய பல பதிவுகளில் பார்த்திருக்கிறோம். இவற்றில் மிக முக்கியமானது பத்து நாடிகளாகும். அவை பற்றியும் இந்த தொடரின் ஆரம்பத்தில் விளக்கியிருக்கிறேன்.

இந்த நாடிகளின் ஊடே பத்து விதமான வாயுக்கள் ஓடுவதாக சித்தர் பெருமக்கள் கூறியிருக்கின்றனர். அவை முறையே

பிராணன் - உயிர்க்காற்று
அபாணன் - மலக் காற்று
வியானன் - தொழிற்காற்று
உதானன் - ஒலிக்காற்று
சமானன் - நிரவுக்காற்று
நாகன் - விழிக்காற்று
கூர்மன் - இமைக்காற்று
கிருகரன் - தும்மற் காற்று
தேவதத்தன் - கொட்டாவிக் காற்று
தனஞ்செயன் - வீங்கல் காற்று

இந்த வாயுக்கள் நமது நாடிகளின் ஊடே ஓடிக் கொண்டிருப்பதாகவும், அப்படி ஓடும் இந்த வாயுக்கள் நாடிகளின் முடிச்சுகளில் ஒன்றோடு ஒன்று சந்திக்கும் இடங்களையே வர்ம ஸ்தானங்கள் அல்லது வர்ம புள்ளிகள் என்றும் குறிப்பிடுகின்றனர். இப்படி ஒரே முடிச்சில் பல வாயுக்கள் சந்திக்கும் போது அவை நுட்பமான வர்ம புள்ளிகளாகின்றன.

இத்தகைய நுட்பமான வர்ம ஸ்தானங்களில் அடி படும் போது அவை உயிராபத்தை விளைவிக்கக் கூடியவை. “படாத இடத்தில் பட்டு பொட்டென போய்விட்டான்” என்கிற பேச்சு வழக்குகள் இந்த நுட்பமான வர்ம ஸ்தானங்களில் படும் அடியினையே குறிப்பிடுகிறது.

இப்படி நுட்பமான வர்ம புள்ளிகளை எந்த ஒரு குருவும் ஆரம்ப நிலையில் கற்றுத் தருவதில்லை. குறைந்தது பன்னிரெண்டு வருட பயிற்சிக்குப் பின்னரே குருவானவர் இதனை அருளுவாராம். அந்த கட்டத்தில்தான் மாணவர் வர்மக் கலைக்குத் தேவையான உடல் லாவகமும், மனவலிமையும், மனப்பக்குவமும் பெற்றவராகி இருப்பாராம்.

இப்படி ஒன்றுக்கும் மேற்பட்ட வாயுக்கள் சந்திக்கும் நுட்பமான வர்ம புள்ளிகளே நோக்கு வர்மத்தில் பயன் படுத்தப் படுகிறது. இந்த புள்ளிகளின் மீது கவனக் குவிப்போடும், தன் முனைப்போடும் பார்வையை செலுத்தும் போது பார்வையின் தீவிரம் பொறுத்து விளைவுகளை உண்டாக்க முடியும் என்கிறார் அகத்தியர்.

பார்வையின் தீவிரம் பொறுத்து ஒருவரை நிலை குலையச் செய்வதில் துவங்கி, அவரை மயக்கமடையச் செய்யவோ அல்லது அவரின் உயிரினை போக்கவோ செய்திட முடியுமாம். இவை தவிர இன்னும் மேம்பட்ட நிலையில் அவரை தன் விருப்பத்திற்கு ஏற்ப இயக்கவும் முடியும் என்கிறார். இதைத்தான் சமீபத்தைய திரைப் படத்தில் காட்சிப் படுத்தியிருந்தனர்.

கீழே உள்ள படத்தில் நமது முகத்தில் உள்ளதாக அகத்தியர் சொல்லும் நோக்கு வர்ம புள்ளிகளை சிவப்புப் புள்ளியால் குறியிட்டுக் காட்டியிருக்கிறேன். இந்த படத்தினை ஒரு தகவல் பகிர்வாக மட்டுமே கருத வேண்டுகிறேன். யாரும் ஆர்வ மிகுதியினால் விஷப் பரிட்சைகளில் இறங்கிட வேண்டாம். ஏனெனில் நம்மைப் போன்றவர்களால் இதனை நிச்சயம் கைக் கொள்ள முடியாது. குருமுகமாக முறைப்படியான தொடர் பயிற்சிகள் மற்றும் கடுமையான கட்டுப்பாடுகளின் ஊடே வளர்த்தெடுக்கப் பட வேண்டியது இந்தக் கலை.



இந்த நோக்கு வர்ம தாக்குதலில் இருந்து நம்மை காத்துக் கொள்ளவும் வழிவகைகள் இருக்கின்றனவாம். அவற்றை குருமுகமாகவே அறிவது சிறப்பு என்பதால் அதை இங்கே ஒரு தகவலாக மட்டுமே பதிந்து வைக்கிறேன். தற்போதும் தமிழகத்தில் உள்ள கன்னியாகுமரி மற்றும் கேரளத்தின் சில பகுதிகளில் தேர்ந்த வர்மக் கலை ஆசான்கள் இருப்பதாகக் கூறப்படுகிறது. அத்தகையவர்கள் ஒருபோதும் தங்களை வெளிக் காட்டிக் கொள்வதில்லை. எனவே ஆர்வமுள்ளவர்கள் அவர்களைத் தேடியறிந்து பணிந்து இந்தக் கலையினை பழகிடலாம்.

நம்மிடம் இருக்கும் நூல்கள் நமது தேடலின் பாதையில் வழிகாட்டும் விளக்காக மட்டுமே இருக்க முடியும். அதைத் தாண்டிய நிபுணத்துவத்தை குருமுகமாக மட்டுமே அறியமுடியும்.

சித்தர்கள் இராச்சியம் தளத்தின் பதிவுகளை ஆங்கிலத்தில் வாசிக்க...